Яўген Хмара будзе часова выконваць абавязкі міністра абароны Украіны. Хто ён такі?

Уладзімір Зяленскі паведаміў, што в.а. кіраўніка СБУ Яўген Хмара будзе часова выконваць абавязкі міністра абароны. Пра гэта ён паведаміў у сацыяльных сетках.

Да канца незразумела, як Хмара можа ўзначаліць Мінабароны нават у статусе в.а. Для гэтага ўрад спачатку павінен прызначыць яго намеснікам міністра і ўпаўнаважыць часова кіраваць ведамствам. Хмара знаходзіцца на вайсковай службе, а паводле закону такую пасаду можа займаць цывільны чалавек, паведамляе Бі-бі-сі — Украіна.

«Стратэг, прафесіянал, арыентаваны на людзей кіраўнік і аўтарытэтны вайсковец — так характарызавалі в.а. кіраўніка СБУ Яўгенія Хмару тыя, хто служыў і працаваў побач з ім.

«У «Альфу» мы прыйшлі практычна ў адзін час. Да гэтага ён служыў у Цэнтры спецыяльнага прызначэння «Амега» Нацыянальнай гвардыі, а я — у Дэсантных войсках», — успамінае палкоўнік СБУ, дэпутат фракцыі «Голас» Раман Кастэнка.

Тое, што Хмара з'яўляецца выхадцам з «Амегі», пацвердзіў і цяперашні начальнік гэтага Цэнтра спецпрызначэння генерал-маёр Павел Яцюк.

Раман Кастэнка так успамінае пачатак працы з Хмарам у «Альфе»: «Яўген пачынаў з таго, што быў брычарам (байцом сілавога падраздзялення, галоўная задача якога — забяспечыць хуткае пранікненне падраздзялення ўнутр будынка), а потым узначаліў «спецназ у спецназе» — суперэлітнае падраздзяленне ўнутры самой «Альфы», куды быў удвая мацнейшы адбор, чым у сам Цэнтр спецаперацый «А»».

Згодна з афіцыйнай біяграфіяй Хмары, распаўсюджанай СБУ, у структуры Службы бяспекі ён працуе ўжо амаль 15 гадоў. У прыватнасці, у пачатку поўнамаштабнага ўварвання ён удзельнічаў у вызваленні Кіеўскай вобласці, а пасля яе дэакупацыі быў накіраваны на Данеччыну.

Як расказвалі BBC News Украіна людзі, якія ведаюць Хмару, ён, сярод іншага, удзельнічаў у баях за Севераданецк і Лісічанск. Хмара быў адным з удзельнікаў аперацыі па вызваленні вострава Змяіны летам 2022 года. Сам ён называў яе «адной з ключавых перамог над ворагам» у ваенным, эканамічным і псіхалагічным аспектах.

«Для байцоў Цэнтра спецаперацый «А» СБУ было гонарам удзельнічаць у гэтай спецаперацыі і годна яе рэалізаваць», — падкрэсліваў Хмара ў чэрвені 2023 года.

У красавіку 2023 года прэзідэнт Зяленскі прызначыў Хмару начальнікам Цэнтра спецаперацый «А».

«Альфа» пасля гэтага проста заграла іншымі фарбамі, і ўсё, што яна рабіла потым, было вынікам стратэгічных задум Яўгенія разам з Васілём Малюком», — кажа Раман Кастэнка.

«Цэнтр спецаперацый «А» стабільна ўваходзіць у тройку найбольш выніковых падраздзяленняў Сіл абароны па аб'ёмах знішчанай тэхнікі і жывой сілы праціўніка з дапамогай беспілотнікаў», — адзначаюць у самой СБУ. Там таксама дадаюць, што аператары дронаў Цэнтра спецаперацый «А» непасрэдна ўдзельнічалі ў спецаперацыі «Павуціна».

Хмара як камандзір цэніць сваіх падначаленых, кажуць тыя, хто бачыў яго ў працы.

«Для яго арыентаванасць на людзей важная ва ўсіх кірунках. Ён асабіста ведае кожнага параненага, дапамагае ім, падтрымлівае іх, а таксама падтрымлівае сем'і загінулых», — адзначае Раман Кастэнка.

Сам Хмара неаднаразова расказваў пра тое, як разам з байцамі «Альфы» непасрэдна ўдзельнічае ў спецаперацыях.

Павялічыць

«Менавіта там можна зразумець, што менавіта патрэбна асабоваму складу, якія ў іх патрэбы… Другое — камандзір павінен дакладна разумець, як, што і дзе працуе. Трэцяе — гэта пытанне даверу: калі асабовы склад, асабліва ў цяжкіх сітуацыях, бачыць побач свайго камандзіра, усё становіцца на свае месцы», — раней падкрэсліваў новы в.а. кіраўніка СБУ.

Цяпер Хмара — поўны кавалер ордэна Багдана Хмяльніцкага, а таксама ўзнагароджаны ордэнам «За мужнасць» III ступені і адзнакай прэзідэнта Украіны «Крыж баявых заслуг».

«Яўген досыць аўтарытэтны ў спецслужбах, яго ведаюць усе кіраўнікі структур. Ён падтрымлівае сувязі з партнёрамі, што таксама важна. Яго ведае парламенцкі камітэт і добра з ім камунікуе», — адзначае сакратар камітэта Вярхоўнай Рады па пытаннях нацыянальнай бяспекі, абароны і разведкі Раман Кастэнка.

• 8
• 0
• 0
• 0
• 0
• 0
• 0
• 0