Міхаіл Фёдараў пацвердзіў, што прычына яго адстаўкі — канфлікт з галоўнакамандуючым УСУ Сырскім

Па словах Міхаіла Фёдарава, Украіне патрэбныя «кардынальныя кадравыя рашэнні», бо без іх немагчыма перамагчы праціўніка з меншымі стратамі.

Фёдараў таксама пацвердзіў наяўнасць канфлікту з Аляксандрам Сырскім. Ён заявіў, што галоўнакамандуючы нібыта блакаваў ягоныя ініцыятывы і не хацеў абмяркоўваць праблемныя пытанні, а замест гэтага нібыта займаўся ўнутранымі інтрыгамі.

Пры гэтым Фёдараў адзначыў, што рашэнне не звальняць Сырскага належыць прэзідэнту Украіны як вярхоўнаму галоўнакамандуючаму. Ён заявіў, што прымае гэтае рашэнне і будзе вучыцца працаваць у наяўных умовах, аднак падкрэсліў, што яго каманда сутыкнулася з поўным блакаваннем прапанаваных рэформаў.

«Калі прэзідэнт сказаў, што не плануе змяняць Сырскага, я з гэтым рашэннем цалкам пагадзіўся і сказаў, што значыць я буду вучыцца працаваць з ім. Бо наш кліент — увесь украінскі народ.

Але мы сутыкнуліся з тым, што ўсе ініцыятывы, якія мы прапаноўвалі, пачалі блакавацца. І Сырскі не гатовы асабіста ў вочы гаварыць пра праблемы. Ён гатовы хадзіць асабіста на сустрэчы, плесці інтрыгі, думаць, што хтосьці заказаў у медыях нейкую кампанію, а не праблема ў дзеяннях, якія адбываюцца. Гэта прывяло да таго, што па факце ён паставіў ультыматум.

Замест таго, каб прыдумаць як асіметрычна перамагчы Расію, ён прыдумаў, як раскалоць краіну. І ў гэтым ёсць вялікая праблема…

Я не ставіў умоў, «або я, або Сырскі». Я сказаў, што значыць будзем перамагаць Расію з такім галаўкамам».

Разам з тым Фёдараў падкрэсліў, што не варта недаацэньваць Сырскага як вайсковага камандуючага. Ён нагадаў, што ў 2022 годзе Сырскі адыграў значную ролю ў абароне Украіны, у тым ліку ў баях за Кіеў і Харкаў, а таксама падчас вызвалення Херсона. Аднак, паводле Фёдарава, пасля гэтага характар вайны істотна змяніўся і патрабуе іншых падыходаў.

«Але вайна цалкам змянілася, цалкам. Дроны змяняюцца па 4 разы на год. Сістэма кіравання змянілася, і мы павінны мяняцца. Мы не можам ехаць на тым, што было тады. Трэба разумець, што трэба было рабіць тады і што трэба зараз, каб перамагаць Расію.

Я не думаю, што гэта праблема эга. Я думаю, што ёсць іншыя нейкія прычыны… Не падпісана шмат дакументаў. Я адкрыта казаў пра гэта: бюракратычна мы ўмеем гуляць, давайце гэта зробім. Мне сказалі: «Не чапай!», і я цярпеў і быў гатовы спакойна працаваць, пакуль галаўкам не паставіў ультыматум».

Раней украінскія і замежныя сродкі масавай інфармацыі ўжо паведамлялі пра напружанасць паміж Фёдаравым і Сырскім. А пасля паведамленняў пра адстаўку Фёдарава ў некалькіх украінскіх гарадах прайшлі акцыі ў яго падтрымку.

• 4
• 1
• 0
• 8
• 0
• 2
• 2
• 0