Адзінокі балкон з каванай агароджай па вуліцы Валадарскага, 4 быў галоўнай разынкай дома, пра якую расказвалі турыстам на экскурсіях па горадзе.
Знікненне гістарычнага элемента заўважылі ў Threads. Турыстам раней расказвалі гарадскую легенду, звязаную з гэтым домам.
Гісторыя гучала прыкладна так: калі ў гэты дом засяляўся начальнік астрога, ён запатрабаваў, каб ягоная кватэра адрознівалася ад жылля падначаленых. У выніку толькі для яго зрабілі балкон, які і праіснаваў да нашых дзён.
Але, будзем спадзявацца, гэта не канец балкона: дом на вуліцы Валадарскага, 4 сапраўды мае статус гісторыка-культурнай каштоўнасці і з яго сцяны ўжо тырчаць два новыя металічныя швелеры, якія паслужаць апорай для новай балконнай пліты. Зараз тут праводзіцца запланаваны капітальны рамонт.
Легенда часткова мае пад сабой гістарычны грунт. Гэты дом сапраўды цесна звязаны з гісторыяй сумнавядомага турэмнага замка (Валадаркі), размешчанага побач. Як сведчыць гістарычная даведка, будынак быў узведзены ў 1890‑я як жылы дом для адміністрацыі мінскай турмы. Яго пабудавалі за межамі асноўнай турэмнай агароджы. На першым паверсе тады знаходзілася вялікая чатырохпакаёвая кватэра самога начальніка турмы Іосіфа Воляна, а таксама кватэры яго памочнікаў.
Першапачаткова будынак быў двухпавярховым і неатынкаваным, а яго цагляная муроўка імітавала руст і мела багаты дэкор, аднак у сярэдзіне XX стагоддзя да яго надбудавалі трэці паверх і патынкавалі, значна спрасціўшы першапачатковы выгляд. Магчыма, што і балкон не быў адзіным на фасадзе, проста іншыя не дайшлі да нашага часу.
«Наша Нiва» — бастыён беларушчыны
ПАДТРЫМАЦЬЦяпер чытаюць
«Бульба» з Оршы пайшоў ваяваць за Расію — цяпер сястра шукае яго ці хаця б яго парэшткі1
Каментары