Статкевіч: Калі зноў пачнуцца масавыя пратэсты, яны ўжо не будуць такімі мірнымі, як у 2020‑м. А ЕС правільна перастаў верыць казкам Лукашэнкі
«Я лічу, што Еўрапейскі саюз нарэшце знайшоў рацыянальны падыход у адносінах да Лукашэнкі», — адказаў палітык на словы Марыі Калеснікавай.
Мікола Статкевіч акрэсліў сваю палітычную пазіцыю ў інтэрв'ю нямецкаму выданню Zeit.
Мікола Статкевіч: Для мяне немагчыма пакінуць краіну. Гэта было б тое самае, што кінуць мільёны беларусаў, якія па-ранейшаму тут жывуць. Ведаеце, на вуліцы да мяне пастаянна падыходзяць людзі, паціскаюць руку, дзякуюць мне.
ZEIT: І сёння таксама?
Статкевіч: Так. Так шмат людзей выехала пасля масавых пратэстаў 2020 года. Уявіце, як пачуваюцца тыя, хто застаўся тут. У каго сябры, знаёмыя, дзеці з'ехалі. Быццам у гэтай краіне зусім няма надзеі, няма будучыні. Але непрыманне рэжыму Лукашэнкі ўсё роўна вялікае. Я хачу заставацца з тымі беларусамі, якія тут, і чакаюць толькі новага шанцу нешта змяніць.
ZEIT: Масавыя пратэсты летам 2020 года былі жорстка задушаны, і людзей і сёння садзяць за ўдзел у іх.
Статкевіч: Сёння можна атрымаць дзесяць гадоў турмы ўжо за лайк ці рэпост. Цэлыя сем'і трапляюць у турму. Але гэтыя жудасныя рэпрэсіі існуюць толькі таму, што рэжым баіцца новых пратэстаў. Людзі ненавідзяць Лукашэнку яшчэ больш, і ён гэта адчувае. Я думаю, Лукашэнка спіць начамі горш за мяне.
ZEIT: Чаму вы так лічыце?
Статкевіч: Калі зноў пачнуцца масавыя пратэсты, яны ўжо не будуць такімі мірнымі, як у 2020-м, калі пратэстоўцы нават прыбіралі за сабой смецце.
ZEIT: Як Еўропе трэба паводзіцца з Аляксандрам Лукашэнкам? Ізаляваць і санкцыяваць, як ЕС, ці ўсё ж шукаць дыялог, як ЗША?
Статкевіч: Захад занадта доўга паддаваўся на хітрыкі Лукашэнкі. Я лічу, што Еўрапейскі саюз нарэшце знайшоў рацыянальны падыход у адносінах да Лукашэнкі.
ZEIT: Вядомыя апазіцыянеры, напрыклад Марыя Калеснікава, папярэджваюць, што такая палітыка ЕС можа падштурхнуць Беларусь у абдымкі Пуціна. Вы ўсё роўна лічыце палітыку ізаляцыі правільнай?
Статкевіч: Гэтую старую казку пра тое, што Лукашэнка нібыта хоча вырвацца з абдымкаў Пуціна, Захаду расказвалі шмат гадоў. Але як могуць сіямскія блізняты аддзяліцца адзін ад аднаго? Разам з тым я супраць ізаляцыі беларускага насельніцтва. Людзі павінны мець магчымасць бачыць нешта іншае, акрамя Беларусі і Расіі, і наведваць сваякоў у ЕС.
ZEIT: А палітыка санкцый?
Статкевіч: Думаю, гэта пытанне да маёй хатняй юрысткі. Марына, колькі гадоў зараз даюць за заклік да санкцый? (смяецца)
ZEIT: Вы выглядаеце спакойным і поўным надзеі. Вам не страшна ад таго, што яшчэ можа адбыцца?
Статкевіч: Я ўжо даўно ўсімі сіламі змагаюся за свабоду сваёй краіны. Дзеля гэтага я ўжо прынёс шмат ахвяр і не спынюся на паўдарозе. Колькі разоў я мог памерці. Але сёння я магу глядзець у акно і бачыць дрэвы і неба — тое, чаго я гадамі не бачыў. І я разам з маёй любімай жонкай. Кожны дзень для мяне — падарунак.
Каментары
Яны злілі 20 год і стварылі ўмовы для перасялення расейцаў у Беларусь, што зараз і адбываецца.
[Зрэдагавана]