Кіеў рыхтаваў другое «Павуцінне» супраць аэрапортаў Масквы, але план спынілі
Паводле інфармацыі выдання The Atlantic, у пачатку 2026 года ўкраінскае кіраўніцтва разглядала магчымасць правядзення маштабнай аперацыі з выкарыстаннем дронаў са штучным інтэлектам, мэтай якой было надоўга спыніць працу аэрапортаў Масквы і прылеглых да сталіцы расійскіх аэрапортаў. Праект атрымаў кодавае імя M&Ms.
Задумка прадугледжвала масавы запуск невялікіх беспілотнікаў, якія павінны былі пераадолець расійскую супрацьпаветраную абарону і атакаваць авіяцыйную інфраструктуру. Паводле ацэнкі аднаго з суразмоўцаў выдання, для гэтага магло спатрэбіцца да тысячы дронаў за адну ноч.
Асаблівасцю аперацыі павінны былі стаць аўтаномныя беспілотнікі з сістэмамі штучнага інтэлекту. Яны маглі самастойна вызначаць цэлі, параўноўваючы выявы мясцовасці з загадзя загружанымі картамі і фотаздымкамі. Менавіта выкарыстанне такой тэхналогіі стварала найбольшыя юрыдычныя і маральныя праблемы.
Галоўнай мэтай было не столькі непасрэднае разбурэнне аэрапортаў, колькі працяглае закрыццё паветранай прасторы над Масквой для цывільнай авіяцыі. Украінскі бок разлічваў, што гэта прымусіць міжнародныя авіякампаніі спыніць рэйсы ў Расію, а таксама створыць сур'ёзныя нязручнасці для расійскіх чыноўнікаў, алігархаў і іншых прадстаўнікоў эліты.
Паводле задумы, узніклыя эканамічныя і сацыяльныя праблемы маглі б узмацніць ціск на Уладзіміра Пуціна і падштурхнуць расійскае кіраўніцтва да перамоў.
Аднак яшчэ на этапе прэзентацыі праекта прэзідэнт Украіны Уладзімір Зяленскі выказаў сур'ёзныя асцярогі. Найперш яго непакоіла магчымасць памылковага распазнання цэлі і ўдару па цывільным самалёце, што магло прывесці да гібелі пасажыраў і членаў экіпажа. Нягледзячы на гэтыя рызыкі, падрыхтоўку аперацыі працягнулі.
Паводле дзвюх крыніц The Atlantic, праект быў спынены ў ліпені пасля звальнення міністра абароны Украіны Міхаіла Фёдарава. Суразмоўцы выдання называюць яго адным з галоўных архітэктараў гэтай задумы. Фёдараў займаўся развіццём украінскай праграмы вайсковых дронаў, фармаваннем каманды праграмістаў для сістэм штучнага інтэлекту і пошукам еўрапейскага фінансавання.
Пасля прызначэння новым міністрам абароны Яўгена Хмары будучыня праекта застаецца нявызначанай. Адзін з суразмоўцаў выдання не выключыў, што яго могуць аднавіць, але для гэтага спатрэбіцца новая каманда і каля трох месяцаў падрыхтоўкі.
Пуцін стаў пазбягаць паездак у рэгіёны ў еўрапейскай частцы Расіі, куды рэгулярна далятаюць дроны
Украінская аперацыя «Павуцінне» магла сарвацца ў апошні момант — пільны дальнабойшчык знайшоў беспілотнікі ў корпусе
У Грузіі затрымалі грузавік з украінскім гексагенам. Ён нібыта быў прызначаны для аперацыі «Павуцінне-2»
«Мы планавалі да 9 мая гэта зрабіць, але кіроўцы пайшлі на Вялікдзень у запой». Кіраўнік СБУ расказаў падрабязнасці пра аперацыю «Павуцінне»
Цяпер чытаюць
У Варшаве сёння развітваюцца з Аляксандрам Мілінкевічам ФОТАРЭПАРТАЖ
Каментары
Дастаткова запраграміраваць кампутар на тое, што самалёт не можа быць цэллю. Унесці самалёт у стоп-ліст. Ці як там называецца.
І загрузіць у спіс цэляў фоты кіраўніцтва РФ, асабіліва вайсковага.