Харватыя карыстаецца жаданнем Чарнагорыі ўступіць у Еўрасаюз, каб павырашаць на сваю карысць старыя спрэчкі
Харватыя папярэдзіла, што нявырашаныя спрэчкі з Чарнагорыяй могуць перашкодзіць уступленню гэтай краіны ў Еўрасаюз да 2028 года. Заграб перадаў урадам краін ЕС дакумент з васьмю ўмовамі, якія лічыць неабходнымі для завяршэння перамоў аб далучэнні Чарнагорыі, паведамляе Euronews.
Чарнагорыя застаецца адным з галоўных кандыдатаў на наступнае пашырэнне Еўрасаюза і разлічвае стаць яго 28‑й краінай ужо праз два гады. Краіна дасягнула істотнага прагрэсу ў перамовах: з 33‑х раздзелаў ужо закрыты 21. На гэтым тыдні былі завершаныя яшчэ тры раздзелы — па статыстыцы, эканамічнай палітыцы і занятасці.
Аднак Харватыя працягвае блакаваць прасоўванне па шэрагу іншых напрамкаў, у тым ліку па транспарце, знешніх сувязях, асноўных правах і ўнутраных справах. Паколькі кожная дзяржава ЕС можа ўплываць на працэс пашырэння, пазіцыя Заграба застаецца сур'ёзнай перашкодай для чарнагорскай еўраінтэграцыі.
Асноўныя рознагалоссі звязаныя з войнамі 1990‑х гадоў і наступствамі распаду Югаславіі. Адно з найбольш адчувальных пытанняў — лагер Морынь у Чарнагорыі, дзе ў 1991—1992 гадах утрымлівалі харвацкіх мірных жыхароў і ваеннапалонных. Харватыя патрабуе кампенсацыі для прыкладна 300 былых вязняў, а таксама захавання ў адкрытым доступе мемарыяла на месцы лагера.
Заграб таксама настойвае на высвятленні лёсу 14 чалавек, якія зніклі без вестак падчас вайны за незалежнасць Харватыі, і больш поўным расследаванні ваенных злачынстваў, у тым ліку злачынстваў супраць мірнага насельніцтва і адказнасці камандзіраў за іх учынкі.
Яшчэ адна праблема — маёмасныя спрэчкі, якія ўзніклі пасля распаду Югаславіі. Харватыя патрабуе ўрэгуляваць сітуацыі, калі харвацкія сем'і страцілі сваю маёмасць без належнай кампенсацыі. Акрамя таго, яна хоча вярнуць сабе вучэбны паруснік «Ядран», які пасля распаду федэрацыі застаўся пад кантролем Чарнагорыі.
Бакі таксама не ўрэгулявалі пытанне сухапутнай і марской мяжы. Харватыя выступае за канчатковае вырашэнне тэрытарыяльных рознагалоссяў у адпаведнасці з высновамі Арбітражнай камісіі Канферэнцыі па Югаславіі.
Нягледзячы на жорсткую пазіцыю, Харватыя заяўляе, што падтрымлівае ўступленне Чарнагорыі ў ЕС. Аднак харвацкія ўлады падкрэсліваюць, што ключавыя двухбаковыя спрэчкі дагэтуль не вырашаныя і таму застаюцца перашкодай для далейшага прасоўвання Чарнагорыі да сяброўства ў Еўрасаюзе.
Бізнэсовец родам з Бабруйска адмовіцца ад свайго гіганцкага аўстралійскага заробку дзеля шанцу атрымаць $35 мільёнаў3
Каментары