«Шасціпалосная аўтастрада» да прэзідэнцтва. Беспарадкі ў Францыі ўзмацняюць шанцы Лё Пэн на прэзідэнцтва

У суботу, 17 кастрычніка, па Францыі пракаціліся найбуйнейшыя за некалькі гадоў беспарадкі. Іх удзельнікі рабавалі крамы, падпальвалі будынкі і пашкоджвалі дзяржаўныя ўстановы. На наступную ноч рабаванні працягнуліся, у тым ліку ў заможных раёнах Парыжа.

У нядзелю Макрон звярнуўся да краіны, але не абвясціў надзвычайнага становішча. Апаненты і былыя паплечнікі раскрытыкавалі яго выступ за адсутнасць канкрэтных рашэнняў для аднаўлення парадку.

У панядзелак, 19 кастрычніка, прэм’ер-міністр Себасцьян Лекарню абвясціў пра ўвядзенне каменданцкай гадзіны ў асобных месцах. Макрон адмовіўся прыняць адстаўку міністра ўнутраных спраў і даручыў праверыць магчымыя правалы ў зборы інфармацыі і падрыхтоўцы паліцыі да беспарадкаў.

Магчымасці прэзідэнта супакоіць незадаволеных цяпер значна меншыя, чым падчас пратэстаў «жоўтых камізэлек» у 2018—2019 гадах. Тады ён пайшоў на саступкі коштам у мільярды еўра. Цяпер Францыя мае вялікі дзяржаўны доўг і адзін з найбуйнейшых бюджэтных дэфіцытаў у еўразоне. Новыя выдаткі абмежаваныя станам фінансаў, а праводзіць рашэнні праз расколаты парламент складана.

Такім чынам, Макрон апынуўся паміж супрацьлеглымі патрабаваннямі: інвестары чакаюць стрымлівання дзяржаўных выдаткаў, а пратэстоўцы — большай падтрымкі. Беспарадкі дадаткова напалохалі фінансавыя рынкі, для якіх палітычная нестабільнасць азначае большую рызыку.

Былыя саюзнікі Макрона звязваюць цяперашні тупік з яго рашэннем распусціць парламент і правесці датэрміновыя выбары ў 2024 годзе. Яны аслабілі прэзідэнта і не далі краіне ўстойлівай парламенцкай большасці.

«Канец гэтага тэрміну — павольная агонія», — напісаў у X былы дэпутат з лагера Макрона Лаік Кервран. Ён заявіў, што прэзідэнт паралізаваў краіну сваім «абсурдным рашэннем» распусціць парламент.

Экс-прэм’ер Эдуар Філіп, які рыхтуецца да ўласнага ўдзелу ў прэзідэнцкіх выбарах, таксама раскрытыкаваў Макрона. Пасля яго звароту ён напісаў, што, як і мільёны французаў, хацеў бы пачуць рашэнні і ўбачыць ініцыятывы для аднаўлення парадку.

На гэтым фоне палітычную выгаду можа атрымаць лідарка ўльтраправага «Нацыянальнага аб’яднання» Марын Лё Пэн. Як адзначае Reuters, яна можа прыцягнуць і людзей, незадаволеных падзеннем узроўню жыцця, і тых, каго напалохалі рабаванні ды падпалы. У сваім відэазвароце ў нядзелю Лё Пэн паказала ўладу Макрона як тую, што развальваецца, а сябе — як палітыка, здольнага аднавіць парадак.

«Лё Пэн больш не трэба траціць грошы на перадвыбарчую кампанію. Перад ёй не проста вольны шлях — гэта шасціпалосная аўтастрада», — сказаў Reuters яшчэ адзін былы дэпутат з лагера Макрона Жан-Батыст Маро.

Паводле апытанняў, на якія спасылаецца агенцтва, Лё Пэн ужо лідзіруе ў прэзідэнцкай гонцы 2027 года. За выхад у другі тур змагаюцца, сярод іншых, Філіп і лідар радыкальных левых Жан-Люк Меланшон. Апошнія апытанні паказваюць, што Меланшон крыху апярэджвае Філіпа, а яго выхад у другі тур быў бы вельмі спрыяльным для Лё Пен.

Нягледзячы на заклікі апанентаў застацца ў Францыі, у панядзелак Макрон прыбыў у Кувейт у межах паездкі па краінах Персідскага заліва. Ён тлумачыць, што візіт дапаможа забяспечыць пастаўкі паліва і аслабіць эканамічныя цяжкасці, якія падштурхоўваюць людзей да пратэстаў. Але, адзначае Reuters, паездка можа ўзмацніць уражанне, што прэзідэнт не адчувае настрояў у краіне.

Маро расказаў агенцтву, што падчас размовы з Макронам у нядзелю заклікаў яго падрыхтаваць арганізаваны датэрміновы сыход. На думку экс-дэпутата, гэта дазволіла б выйсці з палітычнага тупіка замест таго, каб правесці яшчэ паўгода без яснага кірунку.

«Ён не хоча здавацца, гэта не ў яго характары. Але менавіта гэта ён павінен зрабіць дзеля краіны», — сказаў Маро.

• 0
• 0
• 0
• 0
• 0
• 0
• 0
• 0