Расія гатовая даць Беларусі адтэрміноўку па крэдыце за БелАЭС і дазволіць выплаты ў рублях
Расійскі ўрад ухваліў праект пратакола, які пераносіць на 2024 год тэрмін пачатку пагашэння Беларуссю крэдыту на будаўніцтва Беларускай АЭС у Астраўцы.
Дакумент падпісаны прэм’ер-міністрам РФ Міхаілам Мішусціным і апублікаваны на расійскім афіцыйным партале прававой інфармацыі.
Гаворка пра змены ў міжурадавым пагадненні ад 2011 года пра крэдыт Беларусі ў 10 млрд даляраў на будаўніцтва БелАЭС.
Праект пратакола прадугледжвае, што пагашэнне крэдыту мусіць пачацца праз 6 месяцаў з даты ўводу ў эксплуатацыю БелАЭС, але не пазней за 1 красавіка 2024 года. Пры гэтым выплачваць яго Беларусь будзе ў расійскіх рублях.
Міністэрству фінансаў і МЗС Расіі даручана правесці перамовы з беларускім бокам і па дасягненні дамоўленасці падпісаць пратакол.