У Балтыйскім моры завёўся акунь, які кусае людзей
«Ён есць усё, што трапляе яму на шляху», — кажуць спецыялісты.
Сонечны акунь. Фота: Wikimedia Commons
У Фінляндыі з'явіўся сонечны акунь, які кусае людзей, абараняючы месца адкладвання ікры, піша Postimees са спасылкай на партал Yle.
«Калі вы выпадкова праплывяце побач з нерастам, акунь абавязкова ўкусіць вас. На шчасце, у сонечнага акуня няма вялікіх зубоў, але ён можа пашчыпваць», — сказаў прадстаўнік фінскай рыбалоўнай супольнасці Юха Ояхар'ю.
«Сонечны акунь есць усё, што трапляецца яму на шляху», — дадае ён.
Спецыяліст Цэнтра прыродных рэсурсаў Фінляндыі Сана Кунінгас заклікала мясцовых жыхароў паведамляць, калі яны ўбачаць гэтую рыбу ў прыродзе.
Натуральны арэал сонечнага акуня — Паўночная Амерыка ад Паўночнай Дакоты да Нью-Джэрсі і ад Гудзонава заліва да Паўднёвай Караліны. Сустракаецца ён і ва Усходняй Еўропе. У Беларусі, здаецца, пакуль гэтага акуня не выяўлена.