Расія вярнула ў Беларусь сто тысяч кляшчоў
З Беларусі ў Расію спрабавалі завезці 100 000 кляшчоў-энтамафагаў, але расійскі бок палічыў іх перавозку незаконнай і развярнуў груз на мяжы.
Фота: 32.fsvps.gov.ru
Машыну з кляшчамі Phytoseiulus persimilis спынілі ў прапускным пункце «Красны Камень» (Злынкаўскі раён). Паводле дакументаў, кляшчоў везлі ў Белгародскую вобласць Расіі. На груз быў ветэрынарны сертыфікат, выдадзены беларускай ветэрынарнай службай, а краінай паходжання быў пазначаны Егіпет.
Супрацоўнікі Рассельгаснагляда вызначылі, што звесткі на ўпакоўцы не адпавядаюць інфармацыі ў суправаджальных дакументах. Акрамя таго, у ветэрынарным сертыфікаце не было ўсёй неабходнай інфармацыі і былі пазначаныя некарэктныя звесткі аб прызначэнні і знаходжанні грузу на тэрыторыі Мытнага саюза. Таксама адсутнічаў генеральны дазвол Рассельгаснагляда на ўвоз у РФ з Беларусі насякомых з Егіпта.
У выніку кляшчоў вярнулі ў Беларусь.
Кляшчы-энтамафагі — драпежныя кляшчы, якія выкарыстоўваюцца ў сельскай гаспадарцы для абароны раслін ад шкоднікаў.
Чытайце таксама:
Кляшчы застануцца ў Мінску да лістапада. Дзе ў сталіцы можна падчапіць гэту заразу
Вырасла колькасць выпадкаў хваробы Лайма пасля ўкусу кляшчоў. У якіх раёнах лютуюць кляшчы