Арына Сабаленка перастане быць другой ракеткай свету па выніках «Ралан Гарос»
На гэтай пазіцыі беларуска была з канца студзеня мінулага года, але ўсё перакрэсліла ўчорашняя параза ў чвэрцьфінале.
Арына Сабаленка. Фота: Christophe Ena / AP
Арына Сабаленка страціць другую пазіцыю ў рэйтынгу WTA (Сусветная жаночая асацыяцыя) па выніках «Ралан Гарос». Другой ракеткай свету стане амерыканка Како Гаўф.
Учора Сабаленка сенсацыйна прайграла ў чвэрцьфінале 17-гадовай расіянцы Міры Андрэевай. Сустрэча доўжылася 2 гадзіны 29 хвілін і завяршылася з лікам 6:7 (5:7), 6:4, 6:4 на карысць Андрэевай.
Такім чынам Арына не змагла абараніць 350 балаў за леташні паўфінал «Ралан Гарос» і яна іх згубіць. Гаўф дайшла мінімум да паўфіналу.
Сабаленка стала другой ракеткай свету ў канцы студзеня 2023 года пасля перамогі на Australian Open. Пасля фіналу Адкрытага чэмпіянату ЗША па тэнісе (US Open) у верасні 2023 года яна на два месяцы стала першай ракеткай свету.