Былы міністр юстыцыі Хаменка цяпер возьмецца за мэты ўстойлівага развіцця

Аляксандр Лукашэнка падпісаў указ аб нацыянальным каардынатары па дасягненні мэт устойлівага развіцця. Гэтую пасаду зойме былы міністр юстыцыі Сяргей Хаменка. 

Сяргей Хаменка

У красавіку 2024 года Сяргею Хаменку знялі з пасады кіраўніка Мінюста і прызначылі ў Савет Рэспублікі, дзе ён цяпер з'яўляецца намеснікам старшыні гэтага органа Наталлі Качанавай.

У Мінюст Сяргей Хаменка у кастрычніку 2021 года трапіў без ніякай для гэтага падрыхтоўкі, паколькі да юрыспрудэнцыі да таго часу не меў аніякага дачынення, а служыў у органах унутраных спраў. Перад тым ён узначальваў Дэпартамент аховы МУС, а са снежня 2019 года займаў пасаду намесніка міністра ўнутраных спраў.

Зрэшты, вялікіх прававых кампетэнцый ад яго ніхто і не патрабаваў, асноўнай задачай было забяспячэнне фармальнай ліквідацыі ўсіх без разбору структур грамадзянскай супольнасці, а з гэтым сілавік у крэсле міністра юстыцыі справіўся бліскуча. Цяпер на чарзе — мэты ўстойлівага развіцця.

Раней пасаду нацыянальнага каардынатара па дасягненні мэт устойлівага развіцця займаў Валерый Бельскі, тым жа самым указам ён вызвалены ад гэтай пасады.

Каментары да артыкула