Гамяльчанка купіла ялінку з жывым «падарункам». Цяпер не ведае, чым карміць
Зусім нядаўна стала вядома, што супрацоўнікі адной з крамаў у Гродне знайшлі ў хурме незвычайную знаходку — жывога міжземнаморскага хатняга гекона. Нечым падобная гісторыя здарылася днямі і ў Гомелі, адно што там знойдзеная жывёліна была не такой экзатычнай, піша «Анлайнер».
Жанчына купіла жывую ялінку ў кадцы на адной з мясцовых гандлёвых пляцовак ад лясгаса. А калі прывезла расліну дахаты, то сярод галінак знайшла жывую яшчарку.
Мяркуючы па каментарах у тыктоку, гаспадыня паспела вызначыць пол рэптыліі і назвала яе Ёлкай. Але чым карміць гадаванца, пакуль не ведае.
На дапамогу прыйшлі каментатары, якія надавалі парад, як найлепш абыходзіцца з гэтай нечаканай для гэтага сезону жывой істотай.