Акаўнт сілавікоў шукае ахвотных паздымаць людзей на форуме апазіцыі. А ў іншых чатах папярэджвае, што гэта небяспечна
Гэта вельмі падобна на стыль ГУБАЗіК — менавіта Артур Гайко сочыць за акцыямі беларускай эміграцыі.
Калаж «Нашай Нівы»
Карэспандэнты «Нашай Нівы» звярнулі ўвагу на дзіўную актыўнасць новастворанага тэлеграм-акаўнта ID 7685816821.
14 студзеня ён уступіў у некалькі чатаў, звязаных з Літвой і Польшчай. 16 студзеня ён напісаў у суполку «Варшава чат» вось такое паведамленне:
Паведамленне невядомага карыстальніка ў чаце «Варшава чат»
На наступны дзень гэты ж акаўнт спытаўся ў літоўскім чаце, ці не прапанавалі камусьці здымаць за грошы форум Ціханоўскай. А сёння ад самай раніцы ён жа раскідвае аднатыпныя паведамленні такога зместу:
Тэкст, які рассылае акаўнт Shane
У чаце беларусаў Вільні акаўнт папярэдзіў карыстальніка, што, маўляў, шукаюць людзей, гатовых быць фатографамі на мерапрыемстве, а пасля «ў іх адбяруць у Беларусі кватэры».
Зусім незразумела, у чым сэнс такой паралельнай гульні ў супрацьлеглых кірунках.
Мы паспрабавалі напісаць акаўнту Shane з пытаннем пра тое, што трэба здымаць у Варшаве. Ён адаслаў нас у тэлеграм-бот @EventShots_bot. Вось што нас насцярожыла.
Па-першае, бот створаны крыва — у ім на дзвюх мовах бачны такі надпіс з процьмай памылак у польскай мове:
Скрыншот тэксту з бота
З польскай тэкст перакладаецца вось так: «Прарыў, Віктар. Дашлі фота або выяву ды атрымаеш графічны доказ. Ананімнасць гарантаваная!»
Па-другое, ён створаны з дапамогай FleepBot, які паказвае ID карыстальнікаў, якія пішуць у бот — менавіта ім карыстаецца ГУБАЗіК, у той час, як у КДБ ёсць самаробныя боты. Гэта важна для аналізу таго, ці сапраўдны чалавек піша ў бот і ці не журналіст ён.
Акурат нядаўна Гайко анансаваў у сваім канале «Беларускі сілавік», што гатовы плаціць за інфармацыю пра беларускую міграцыю і беларускіх добраахвотнікаў. І акурат Гайко летась збіраў інфармацыю пра правядзенне Дня Волі ў эміграцыі.