Сыранкоў: Леніна нельга хаваць, ён павінен быць сімвалам Расіі і Беларусі
Усе размовы пра пахаванне Леніна інспіраваныя «антысаветчыкамі з-за мяжы, многія з якіх з’яўляюцца ідэйнымі спадчыннікамі ўласаўцаў і калабарантаў», заявіў у інтэрв’ю РІА «Навіны» кандыдат у прэзідэнты Беларусі, лідар Камуністычнай партыі Беларусі Сяргей Сыранкоў.
Сяргей Сыранкоў. Фота: tochka.by
Паводле яго слоў, Ленін — гэта найбольш значны ідэолаг сацыялізму і камунізму, а для Беларусі ён з’яўляецца заснавальнікам дзяржаўнасці.
Кіраўнік беларускай Кампартыі нагадаў, што Уладзімір Ленін і Іосіф Сталін падтрымалі правядзенне ў Мінску Усебеларускага з’езду ў снежні 1917 года, на якім была абвешчана патрэба стварэння БССР.
«Ды і для Расіі Ленін — гэта самы вядомы ў свеце рускі чалавек. Таму лічу, што Ленін, як і яго маўзалей, павінны не толькі застацца, але і быць сімваламі Расіі, а таксама нашага беларуска-расійскага саюза», — сказаў Сыранкоў.
Цела Леніна знаходзіцца ў празрыстым саркафагу ў маўзалеі-пахавальні на Чырвонай плошчы каля Крамлёўскай сцяны ў Маскве з 1924 года. З 1953 па 1961 гады ў маўзалеі таксама знаходзіўся саркафаг з целам Сталіна, пасля чаго яго пахавалі.
Чытайце таксама:
Сыранкоў прапанаваў замяніць слова «прэзідэнт» на «старшыня Рэспублікі Беларусь»
Лукашэнка сказаў, што яму спадабаўся «Сярожа Сыранкоў»
Кандыдат у прэзідэнты Сыранкоў прапанаваў аднавіць помнікі Сталіну
Кандыдат у прэзідэнты ад камуністаў заклікае забраць і падзяліць маёмасць апазіцыянераў