Улады абвінавацілі Google у «інфармацыйных правакацыях» супраць выбараў
Ад імя Беларусі ў карпарацыю Google адправілі «ліст з прэтэнзіяй аб умяшанні ў выбары», заявіў міністр інфармацыі Марат Маркаў у каментары прапагандысту расійскага тэлеканала Russia Today Канстанціну Прыдыбайлу.
Марат Маркаў. 27 верасня 2024 года
Гэтым лістом улады хочуць «звярнуць увагу на тое, што ідзе зусім канкрэтнае парушэнне заканадаўства», бо ў згаданых «правакацыях» удзельнічаюць «фармаванні, якія судом прызнаныя ў Рэспубліцы Беларусь экстрэмісцкімі».
«Узаемадзеянне Google з падобнага роду злачыннымі арганізацыямі прымушае, па-першае, задумацца, а па-другое, вельмі моцна адбіваецца на рэпутацыі самога «Гугла», — лічыць Маркаў.
Пра якія правакацыі гаворка, і якім чынам Google у іх «саўдзельнічаў», у каментары не ўдакладняецца.
Акрамя таго, Маркаў заявіў пра неабходнасць стварэння ў Беларусі аналага расійскага Раскамнагляду.
«Заканадаўча трэба гэтыя рэчы дапрацаваць да канца, паколькі так ці інакш мы павінны мець інструменты, якія будуць непасрэдна ўздзейнічаць, як у Расіі, ёсць такая магчымасць, праз Раскамнагляд», — сказаў міністр інфармацыі.
Чытайце таксама:
Следчы камітэт пахваліўся, што «ідэнтыфікаваў 365 удзельнікаў акцый за мяжой»
Кіраўнік МЗС Польшчы спытаў, ці хопіць у беларускіх турмах месца тым, хто не галасаваў за Лукашэнку