Ułady abvinavacili Google u «infarmacyjnych pravakacyjach» suprać vybaraŭ
Ad imia Biełarusi ŭ karparacyju Google adpravili «list z pretenzijaj ab umiašańni ŭ vybary», zajaviŭ ministr infarmacyi Marat Markaŭ u kamientary prapahandystu rasijskaha telekanała Russia Today Kanstancinu Prydybajłu.
Marat Markaŭ. 27 vieraśnia 2024 hoda
Hetym listom ułady chočuć «źviarnuć uvahu na toje, što idzie zusim kankretnaje parušeńnie zakanadaŭstva», bo ŭ zhadanych «pravakacyjach» udzielničajuć «farmavańni, jakija sudom pryznanyja ŭ Respublicy Biełaruś ekstremisckimi».
«Uzajemadziejańnie Google z padobnaha rodu złačynnymi arhanizacyjami prymušaje, pa-pieršaje, zadumacca, a pa-druhoje, vielmi mocna adbivajecca na reputacyi samoha «Huhła», — ličyć Markaŭ.
Pra jakija pravakacyi havorka, i jakim čynam Google u ich «saŭdzielničaŭ», u kamientary nie ŭdakładniajecca.
Akramia taho, Markaŭ zajaviŭ pra nieabchodnaść stvareńnia ŭ Biełarusi anałaha rasijskaha Raskamnahladu.
«Zakanadaŭča treba hetyja rečy dapracavać da kanca, pakolki tak ci inakš my pavinny mieć instrumienty, jakija buduć niepasredna ŭździejničać, jak u Rasii, jość takaja mahčymaść, praz Raskamnahlad», — skazaŭ ministr infarmacyi.