Двух расіян асудзілі ў Польшчы за шпіянаж і вярбоўку ў ПВК «Вагнер»
Суд у Кракаве вынес рашэнне 14 лютага 2025 года. Пракурор запатрабаваў для абвінавачаных 8 гадоў пазбаўлення волі, але суд прызначыў меншы тэрмін — па 5,5 гадоў. Акрамя таго, расіяне Андрэй Г. і Аляксей Т. павінны выплаціць па 30 тысяч злотых у Фонд дапамогі пацярпелым, піша Польскае прэс-агенцтва.
Здымак ілюстрацыйны. Фота: polskieradio24.pl
Мужчын затрымалі ў жніўні 2023 года ў Варшаве. Іх абвінавацілі ў тым, што яны расклейвалі ў Кракаве і Варшаве сотні ўлётак, якія заклікалі далучацца да ПВК «Вагнер». Пракуратура заявіла, што гэта было вярбоўкай наймітаў і элементам гібрыднай вайны на карысць расійскай разведкі.
Абвінавачаныя не прызналі сваёй віны, хоць і не адмаўлялі, што расклейвалі ўлёткі. Абарона настойвала на іх невінаватасці, называючы гэта «банальным здарэннем» без намеру ўдзельнічаць у вярбоўцы.
Адвакаты могуць абскардзіць прысуд.