«Ён кіруецца глыбокім пачуццём адказнасці». Дуда параіў Зяленскаму не сварыцца з Трампам
Прэзідэнт Польшчы паразмаўляў з украінскім калегам пра адносіны з ЗША.
Уладзімір Зяленскі і Анджэй Дуда. Фота: прэс-служба прэзідэнта Украіны
Анджэй Дуда параіў Уладзіміру Зяленскаму не сварыцца з прэзідэнтам ЗША Дональдам Трампам.
Такую параду польскі прэзідэнт даў украінскаму падчас тэлефоннай размовы.
«Некалькі хвілін таму мне патэлефанаваў прэзідэнт Зяленскі. У нас адбылася шчырая размова пасля нядаўніх сустрэч з генералам Келагам і іншых падзей. Я выказаў яму нашу нязменную перакананасць у тым, што адзіны спосаб спыніць кровапраліцце і дасягнуць доўгатэрміновага міру ва Украіне — гэта падтрымка Злучаных Штатаў», — напісаў Дуда ў твітары.
Прэзідэнт Польшчы параіў Зяленскаму захоўваць канструктыўныя адносіны з Трампам.
«Менавіта таму я прапанаваў прэзідэнту Зяленскаму заставацца прыхільным курсу спакойнага і канструктыўнага супрацоўніцтва з Дональдам Трампам. Я веру, што добразычлівасць і сумленнасць ляжаць у аснове перамоўнай стратэгіі ЗША.
У мяне няма сумневаў у тым, што прэзідэнт Трамп кіруецца глыбокім пачуццём адказнасці за глабальную стабільнасць і мір», — напісаў Дуда.
Апошнія дні Трамп моцна крытыкуе Зяленскага на ўсіх пляцоўках. Ён назваў прэзідэнта Украіны «дыктатарам без выбараў», «сярэдняй паспяховасці комікам», а таксама фактычна ўсклаў на Украіну адказнасць за вайну.
Чытайце таксама:
Шрайбман апісвае варыянты, як пры Трампе можа скончыцца вайна ва Украіне
Рубіа пераконвае саюзнікаў, што перамовы з Расіяй не азначаюць рэзкай змены ў рэальнай палітыцы ЗША
У камандзе Трампа выступаюць за ад'езд Зяленскага ў Францыю — New York Post