ChatGPT адкрыў функцыю Deep Research для карыстальнікаў з самай таннай падпіскай. Вось як яна працуе і што можа
19.03.2025 / 10:0
OpenAI анансавала, што функцыя Deep Research будзе даступнай для ўсіх, хто мае падпіску. Новы рэжым значна лепш аналізуе даныя, чым папярэднія функцыі — распавядаем.
ChatGPT. Фота: freemalaysiatoday.com/CC BY 4.0
Функцыя створаная для таго, каб вырашаць за вас задачы, у тым ліку побытавыя. Напрыклад, ён можа дапамагчы выбраць кававарку або пыласос, прааналізаваць сайт канкурэнта ці знайсці найлепшы варыянт для адпачынку. Але не ўсё так бязвоблачна.
Па-першае, яна працуе толькі на платных версіях ChatGPT, якія з Беларусі купіць праблематычна. Але гэта толькі палова бяды.
Па-другое, мадэль часта галюцыніруе. І гэта паказалі нашы тэсты.
У першым з запытаў мы папрасілі ChatGPT уявіць, што мы ладзім бізнэс-мерапрыемства. Мы ўказалі колькасць прадуктаў для фуршэту і папрасілі мадэль знайсці іх па самых танных цэнах на сайце «Едастаўка». ChatGPT задаў некалькі ўдакладняючых пытанняў і пачаў рэсёрч.
Удакладняючыя пытанні ад ChatGPT
Варта зазначыць, што гэта быў удалы кейс. Ён грунтоўна прааналізаваў сайт «Едастаўкі» і нават сам абыходзіў капчу. У выніку ChatGPT высветліў, што танней купляць на сайце для бізнэсу і оптам.
Прыкладна праз гадзіну ён выдаў вынік і нават склаў табліцу з усімі пазіцыямі. Мы праверылі — цэны супадалі, разлік быў карэктны.
Вынік даследвання ад ChatGPT
Пасля гэтага мы вырашылі праверыць, як ён справіцца з каталогам Анлайнера. І тут пачаліся праблемы.
Запыт быў такі — абяры мне ноўтбук па параметрах з зададзенымі характарыстыкамі. Характарыстыкі мы ўказалі даволі строга і ён сапраўды адшукаў патрэбныя мадэлі. Магчыма, гэта наша хіба, бо мы не ўказалі фактар наяўнасці як вырашальны. ChatGPT сам заўважыў, што адзін з ноўтбукаў «цяжка дастаць», таму параіў яшчэ два, якіх таксама не было ў наяўнасці.
Табліца першага рэсёрча ChatGPT
Таксама мы заўважылі, што ён не адрознівае прапановы новых ноўтбукаў і бэушных, якія прадаюцца па аб'явах.
ChatGPT заўважыў, што некаторыя ноўтбукі недаступныя, але ў рэчаіснасці яны ўсе былі недаступныя
Таму мы стварылі новы запыт — павялічылі суму, указалі фактар наяўнасці і папрасілі абраць аптымальны варыянт. Гэтым разам ён даў рады лепш і абраў рэалістычны варыянт.
Выніковы рэсёрч ChatGPT — ужо больш адэкватны
Наш вывад такі: функцыя можа быць карыснай, але слепа давяраць ёй не варта.