Пяць люксавых гатэляў Беларусі, якія знаходзяцца ў невялікіх гарадах. Вы дакладна пра іх не ведалі
Адшукалі, дзе ў Беларусі можна пераначаваць з камфортам у невялікіх гарадах. Вось топ-пяць люксавых гатэляў для геданістаў, якія не хочуць здымаць міні-хорары для тыктоку.
Гатэль «У Пуслоўскіх» у Слоніме. Скрыншот відэа ў інстаграме
Скажам шчыра: адшукаць раскошу было заданнем з зорачкай. Бо ў сталіцы і абласных цэнтрах рэальна знайсці люксавыя гатэлі на працягу 5 хвілін. А ў невялікіх гарадах (нават папулярных у турыстаў) гэта квэст, які не заўсёды заканчваецца паспяхова. Здаецца, у большасці месцаў час спыніўся недзе ў нулявых — і гэта не самы горшы з магчымых варыянтаў.
Самы папулярны каментарый адносна любога сярэднестатыстычнага гатэля недзе ў рэгіёнах гучыць прыблізна так: «Ну што хацець за такія грошы?». І нават калі ты гатовы патраціць на начлег больш за 20—30 рублёў, не факт, што атрымаецца.
Ускладняецца пошук тым, што пасля таго, як «Букінг» перастаў працаваць у Беларусі, так і не з’явілася зручнага сайта, дзе б былі сабраныя ўсе актуальныя прапановы гатэляў у краіне.
5 месца: Бабруйск
Фота: bobruisk.amaks-hotels.ru
Максімум, які сталіца зефіру можа прапанаваць аматарам камфорту, — «Амакс прэм'ер-гатэль». Гучыць пафасней, чым выглядае.
Здаецца, нічога незвычайнага ў нумары «камфорт» няма — ні табе дызайнерскага рамонту, ні мэблі, зробленай пад замову. У пакоі плошчай 25 квадратаў зрабілі «багатую» чырвоную падлогу. Шторы і покрыўка такога ж колеру, відавочна, павінны наводзіць думкі аб каралеўскім жыцці. Але калі не прыдзірацца, то правесці тут ноч можна — каштаваць гэта будзе 116 рублёў за суткі з пары.
Плюс на сайце пазначана, што дазволена пражыванне разам з хатнімі гадаванцамі.
4 месца: Полацк
Фота: slavyanskiy.by
З прыстойнымі гатэлямі ў самым старажытным горадзе Беларусі складана, але ж не безнадзейна. У гасцінічным комплексе «Славянскі» ёсць нават люкс у стылі праванс. Добра, вядома, што ў апісанні нумара ёсць згадка, што праванс гэты па-славянску. Гэта тлумачыць шмат што ў дзіўным дызайне — асабліва керамінаўскую кафлю і танную сантэхніку ў ванным пакоі.
Затое абяцаюць камфортны ложак і шаўкавістую пасцелю — ужо нямала.
Правесці тут адну ноч каштуе 160 рублёў для пары.
3 месца: Астравец
Фота: інстаграм Park hotel у Астраўцы
Калі вас раптам занясе ў Астравец, ведайце: тут ёсць Park Hotel. Гатэль даволі сучасны і са стылёвым дызайнам.
За самы дарагі нумар трэба заплаціць 220 рублёў.
2 месца: Слонім
Побач са Слонімам ёсць сапраўды цудоўны невялікі гатэль «У Пуслоўскіх». Жартаваць тут можна толькі з таго, што па іроніі лёсу знаходзіцца люксавае жыллё на вуліцы Калгаснай.
Зрабілі міні-гатэль у сценах гістарычнай сядзібы Пуслоўскіх. Дакладней у сценах былой стайні ў гэтай сядзібе. Але такая мілая гістарычная дэталь прыводзіць гасцей у замілаванне.
Фота: upuslovskih.by
У гатэлі ўсяго 9 нумароў, аформлены яны стылёва. Побач ёсць рэстаран і СПА. Самы дарагі нумар — дабл люкс — каштуе 280 рублёў за ноч. Сняданак уваходзіць у кошт.
1 месца: Пінск
У гістарычным цэнтры Пінска ў будынку, якому больш за 100 гадоў, працуе люксавы «Гранд Пінск Гатэль». У яго цікавая гісторыя: у 1907 годзе будынак на вуліцы, якая ў той момант называлася Вялікая Кіеўская, набыў Ёсель Басевіч.
Прадпрымальнік зрабіў так: на першым паверсе памяшканні здаваліся ў арэнду, на другім паверсе быў гатэль. У 1921 годзе ў горадзе быў вялікі пажар — ад будынка Басевіча засталіся толькі сцены. Але ж да 1926 года ўсё адбудавалі.
Фота: pinskhotel.by
Цяпер тут ізноў гатэль. VIP-нумар у «Гранд Пінск Гатэль» называюць эксклюзіўным. Тут захаваны некаторыя архітэктурныя элементы з 1900-х гадоў. Адноўлены скляпеністая столь і арка, можна любавацца фрагментам гістарычнай сцяны, на якой захаваліся сляды таго жудаснага пажару, які здарыўся ў мінулым стагоддзі.
Каштуюць суткі ў VIP-нумары 300 рублёў.
Чытайце таксама:
Блогеры пажылі ва ўсіх палацах і замках Беларусі і склалі свой рэйтынг з цэнамі
Дзяўчына арандавала на дзень народзінаў замак пад Мінскам — і ўзарвала тыкток