Piać luksavych hatelaŭ Biełarusi, jakija znachodziacca ŭ nievialikich haradach. Vy dakładna pra ich nie viedali
Adšukali, dzie ŭ Biełarusi možna pieranačavać z kamfortam u nievialikich haradach. Voś top-piać luksavych hatelaŭ dla hiedanistaŭ, jakija nie chočuć zdymać mini-chorary dla tyktoku.
Hatel «U Pusłoŭskich» u Słonimie. Skrynšot videa ŭ instahramie
Skažam ščyra: adšukać raskošu było zadańniem z zoračkaj. Bo ŭ stalicy i abłasnych centrach realna znajści luksavyja hateli na praciahu 5 chvilin. A ŭ nievialikich haradach (navat papularnych u turystaŭ) heta kvest, jaki nie zaŭsiody zakančvajecca paśpiachova. Zdajecca, u bolšaści miescaŭ čas spyniŭsia niedzie ŭ nulavych — i heta nie samy horšy z mahčymych varyjantaŭ.
Samy papularny kamientaryj adnosna luboha siaredniestatystyčnaha hatela niedzie ŭ rehijonach hučyć pryblizna tak: «Nu što chacieć za takija hrošy?». I navat kali ty hatovy patracić na načleh bolš za 20—30 rubloŭ, nie fakt, što atrymajecca.
Uskładniajecca pošuk tym, što paśla taho, jak «Bukinh» pierastaŭ pracavać u Biełarusi, tak i nie źjaviłasia zručnaha sajta, dzie b byli sabranyja ŭsie aktualnyja prapanovy hatelaŭ u krainie.
5 miesca: Babrujsk
Fota: bobruisk.amaks-hotels.ru
Maksimum, jaki stalica ziefiru moža prapanavać amataram kamfortu, — «Amaks premjer-hatel». Hučyć pafaśniej, čym vyhladaje.
Zdajecca, ničoha niezvyčajnaha ŭ numary «kamfort» niama — ni tabie dyzajnierskaha ramontu, ni mebli, zroblenaj pad zamovu. U pakoi płoščaj 25 kvadrataŭ zrabili «bahatuju» čyrvonuju padłohu. Štory i pokryŭka takoha ž koleru, vidavočna, pavinny navodzić dumki ab karaleŭskim žyćci. Ale kali nie prydziracca, to pravieści tut noč možna — kaštavać heta budzie 116 rubloŭ za sutki z pary.
Plus na sajcie paznačana, što dazvolena pražyvańnie razam z chatnimi hadavancami.
4 miesca: Połack
Fota: slavyanskiy.by
Z prystojnymi hatelami ŭ samym staražytnym horadzie Biełarusi składana, ale ž nie bieznadziejna. U haściničnym kompleksie «Słavianski» jość navat luks u styli pravans. Dobra, viadoma, što ŭ apisańni numara jość zhadka, što pravans hety pa-słaviansku. Heta tłumačyć šmat što ŭ dziŭnym dyzajnie — asabliva kieraminaŭskuju kaflu i tannuju santechniku ŭ vannym pakoi.
Zatoje abiacajuć kamfortny łožak i šaŭkavistuju paścielu — užo niamała.
Pravieści tut adnu noč kaštuje 160 rubloŭ dla pary.
3 miesca: Astraviec
Fota: instahram Park hotel u Astraŭcy
Kali vas raptam zaniasie ŭ Astraviec, viedajcie: tut jość Park Hotel. Hatel davoli sučasny i sa stylovym dyzajnam.
Za samy darahi numar treba zapłacić 220 rubloŭ.
2 miesca: Słonim
Pobač sa Słonimam jość sapraŭdy cudoŭny nievialiki hatel «U Pusłoŭskich». Žartavać tut možna tolki z taho, što pa ironii losu znachodzicca luksavaje žyllo na vulicy Kałhasnaj.
Zrabili mini-hatel u ścienach histaryčnaj siadziby Pusłoŭskich. Dakładniej u ścienach byłoj stajni ŭ hetaj siadzibie. Ale takaja miłaja histaryčnaja detal pryvodzić haściej u zamiłavańnie.
Fota: upuslovskih.by
U hateli ŭsiaho 9 numaroŭ, aformleny jany stylova. Pobač jość restaran i SPA. Samy darahi numar — dabł luks — kaštuje 280 rubloŭ za noč. Śniadanak uvachodzić u košt.
1 miesca: Pinsk
U histaryčnym centry Pinska ŭ budynku, jakomu bolš za 100 hadoŭ, pracuje luksavy «Hrand Pinsk Hatel». U jaho cikavaja historyja: u 1907 hodzie budynak na vulicy, jakaja ŭ toj momant nazyvałasia Vialikaja Kijeŭskaja, nabyŭ Josiel Basievič.
Pradprymalnik zrabiŭ tak: na pieršym paviersie pamiaškańni zdavalisia ŭ arendu, na druhim paviersie byŭ hatel. U 1921 hodzie ŭ horadzie byŭ vialiki pažar — ad budynka Basieviča zastalisia tolki ścieny. Ale ž da 1926 hoda ŭsio adbudavali.
Fota: pinskhotel.by
Ciapier tut iznoŭ hatel. VIP-numar u «Hrand Pinsk Hatel» nazyvajuć ekskluziŭnym. Tut zachavany niekatoryja architekturnyja elemienty z 1900-ch hadoŭ. Adnoŭleny sklapienistaja stol i arka, možna lubavacca frahmientam histaryčnaj ściany, na jakoj zachavalisia ślady taho žudasnaha pažaru, jaki zdaryŭsia ŭ minułym stahodździ.
Kaštujuć sutki ŭ VIP-numary 300 rubloŭ.
Čytajcie taksama:
Błohiery pažyli va ŭsich pałacach i zamkach Biełarusi i skłali svoj rejtynh z cenami
Dziaŭčyna arandavała na dzień narodzinaŭ zamak pad Minskam — i ŭzarvała tyktok