Смалявіцкі метэарыт афіцыйна зарэгістраваны ў міжнародным рэестры
21.03.2025 / 16:37
Метэарыт, які ўпаў паблізу Смалявічаў, афіцыйна зарэгістраваны ў Міжнародным каталогу метэарытаў, паведамляе Sputnik.
Фота: Клуб «Астранамінск»
Згодна з рэестрам, метэарыт атрымаў назву па мясцовасці свайго падзення — «Смалявічы», і аднесены да класіфікацыі H6 — «звычайны хандрыт групы H, Тып 6». Падобных метэарытаў у каталогу зарэгістравана больш за 7,2 тысячы.
Прыводзяцца характарыстыкі метэарыта: ягоная маса складае 582 грама, хандрытавая матрыца складаецца з алівіна, нізкакальцыевага піраксена, клінапіраксена, плагіяклаза, траіліта, Fe-Ni-металу, храміту, мерыліту і апатыту.
Звесткі пра рэгістрацыю метэарыта «Смалявічы» будуць апублікаваныя ў 114-м нумары часопіса Meteoritical Bulletin, падрыхтоўка якога вядзецца цяпер.
Метэарыт упаў у раёне Смалявіч 25 снежня мінулага года. Плошча яго пошукаў складала каля 10 квадратных кіламетраў. Праз месяц яго аскепкі былі выяўленыя і адпраўленыя на экспертызу, якая пасля пацвердзіла іх касмічнае паходжанне.
Чытайце таксама:
Знойдзеныя пад Смалявічамі абломкі сапраўды аказаліся метэарытнымі
Метэарыт упаў у Мінскай вобласці. Ахвотныя могуць далучыцца да пошукаў