Менеджарка «Кока-колы», якая пайшла ў палітыку. Што вядома пра зніклую спікерку КР Анжаліку Мельнікаву
Галоўная інтрыга дня — таямнічае знікненне спікеркі Каардынацыйнай рады Анжалікі Мельнікавай. Сувязь з ёй адсутнічае з 25 сакавіка. Па інфармацыі «Нашай Нівы», Мельнікава пакінула Польшчу сама на самалёце. Яна вылецела з тэрыторыі Еўрасаюза, пасля чаго яе след згубіўся.
Зніклі і дзеці Мельнікавай, з якімі яна жыла ў Варшаве. Ці былі яны з ёй, калі яна адлятала, невядома. Былы муж Анжалікі знаходзіцца не ў Польшчы.
Апошнім часам Мельнікава казала, што нібыта моцна захварэла, падзяліліся з «Нашай Нівай» яе калегі. У пачатку лютага яна паведаміла ім, што праз стан здароўя не можа займацца справамі Каардынацыйнай рады.
Анжаліка Мельнікава 3 кастрычніка 2024 года. Фота: «Наша Ніва»
Каардынацыйная рада
Анжаліку Мельнікаву абралі спікеркай Каардынацыйнай рады 3 склікання ў ліпені 2024 года. Вылучалася яна са спісу «Каманды Латушкі і Рух «За Свабоду».
4 лютага 2025 ў канале КР з'явіўся апошні пост з удзелам Мельнікавай. У ім спікерка КР распавядала пра вынікі Форуму Касцюшкі ў Гданьску.
Дзве адукацыі і паспяховая кар'ера ў Беларусі
38-гадовая Анжаліка Мельнікава нарадзілася ў Нясвіжы, скончыла МДЛУ і БДЭУ. Працавала спецыялісткай у галіне камунікацыі і перакладчыцай-рэферэнткай. Да 2018 года была намесніцай генеральнага дырэктара «Кока-Кола Беўрыджыз Беларусь».
У інтэрв'ю Анжаліка казала, што і яна, і муж-айцішнік у Беларусі добра зараблялі. Пабудавалі кватэру, маглі адпачываць сям’ёй некалькі разоў на год. У 2018 годзе Мельнікава сышла ў дэкрэтны адпачынак, цяжарная другой дачкой.
Да 2020 года жанчына асабліва не цікавілася палітыкай у краіне. Але з пратэстамі Мельнікава занялася актывізмам у родным горадзе, куды пераехала падчас каранавірусу. За ўдзел у маршы і велапрабег са сцягамі яе двойчы судзілі па адміністрацыйных артыкулах. Паколькі ў Анжалікі малыя дзеці, ёй давалі штрафы.
У верасні 2020 года сям'я з'ехала з Беларусі.
Эміграцыя і палітычная дзейнасць
Спачатку беларусы пераехалі ў Кіеў, а затым у Польшчу па ІТ-праграме Poland. Business Harbour. У Мельнікавай ёсць польскія карані, праз якія яна адразу атрымала пастаянны дазвол на жыхарства.
У Беластоку жанчына вучыла польскую мову, праектны менеджмент і займалася дзецьмі. Там жа пачала актыўнічаць у фондзе «Беларусь-2020». Гэты фонд сумесна з «Краінай для жыцця» ў 2020 годзе арганізоўваў у Беластоку шэлтар для палітычных уцекачоў з Беларусі.
Некалькі год Мельнікава супрацоўнічала з Паўлам Латушкам. Спачатку як перакладчыца і аўтарка тэкстаў, пасля — занялася праектным менеджментам і стала дарадцай па стратэгічных пытаннях.
Анжаліка Мельнікава, Святлана Ціханоўская і Павал Латушка на маршы 27 студзеня ў Варшаве. Фота: Аб'яднаны пераходны кабінет Беларусі
У снежні 2022 году яна заснавала ў Польшчы фонд Belarus Liberty. Пра дзейнасць гэтай арганізацыі ў інтэрнэце няшмат інфармацыі. У яе назіральную раду, апроч Мельнікавай, уваходзіць Ульяна Шаметавец, прадстаўнічка «Кіберпартызан».
З мужам Мельнікава развялася праз тое, што той «перастаў падтрымліваць актыўнасць і падзяляць погляды».
У Каардынацыйнай радзе Мельнікаву лічылі «чалавекам Латушкі».