«Арабы могуць быць у шоку, але трэнд ёсць трэнд»: беларусам прапаноўваюць дубайскія булкі да Вялікадня
Здавалася б, вар'яцтва з дубайскім шакаладам у Беларусі скончылася. Але ж не: трэнд знайшоў свой працяг у велікодных пачастунках. Паглядзелі, што прапануюць беларускія кандытары і колькі просяць за модныя булкі, пасхі ды яйкі.
Дубайскія булкі. Скрыншот з сайта Kufar.by
У Расіі кулінары пачалі рэкламаваць дубайскія булкі яшчэ некалькі тыдняў таму. Не дзіўна, што мода на трэндавыя пачастункі дайшла і да Беларусі. Праўда, большасць кандытарскіх яшчэ не паказала свой велікодны асартымент.
Затое індывідуальныя кандытары ўжо актыўна выкладаюць свае працы на «Куфары». Булкі, «з тым самым начыннем, якое нікога не пакіне абыякавым» рэкламуе кандытарка з Мінску. За дубайскую булку вагай 450-500 грам яна просіць 45 рублёў.
У рэгіёнах пра трэнд таксама чулі: напрыклад, кандытарка з Гомеля вырабляе шакаладныя булкі з дубайскай начынкай па цане ад 30 да 60 рублёў.
Дубайскія яйкі. Скрыншот сторыс у інстаграме
Кандытарка з Магілёва прапаноўвае набыць шакаладныя яйкі з дубайскай начынкай. Адно такое яйка прадаецца за 18 рублёў, набор з трох яек — за 40.
У інстаграме таксама можна адшукаць аналагічныя прапановы. Так, сталічная кандытарка прымае замовы на дубайскія булкі і дубайскія тварожныя пасхі. Булка каштуе 50 рублёў, пасха — ад 65 да 80 рублёў.
Але выглядае, што не ўсе пакупнікі радыя такой навінцы. Бо ў адным з рылс жанчына быццам бы апраўдваецца: «З кожным днём усё далей ад Бога! Так думаюць некаторыя людзі з нагоды дубайскай булкі, а некаторыя ў захапленні і жадаюць хутчэй яго пакаштаваць. Я думаю, што набліжэнне да Бога не мераецца булкамі. Вядома, арабы могуць быць у шоку, але трэнд ёсць трэнд. Попыт спараджае прапанову».
Чытайце таксама:
Беларускія велікодныя традыцыі ў пытаннях і адказах
Беларусы прадаюць у інтэрнэце шалупінне цыбулі да Вялікадня. Колькі просяць?