Французскі турыст завозіў у Беларусь гашыш у шкарпэтцы
У пункце пропуску «Каменны Лог» на літоўска-беларускай мяжы затрымалі турыста з Францыі. У рэчах мужчыны знайшлі наркотыкі, паведамілі ў Дзяржаўным мытным камітэце.
Фота: Дзяржаўны мытны камітэт
Паводле звестак ДМК, 46-гадовы грамадзянін Францыі ехаў у Беларусь з жонкай на рэйсавым аўтобусе і для праходжання мытнага кантролю абраў зялёны калідор.
«У зале мытнага афармлення службовы сабака даў зразумець гродзенскім мытнікам, што ў мужчыны ёсць забароненыя рэчывы», — сказалі ў камітэце.
Пры аглядзе сумкі з рэчамі француза ў ёй быў знойдзены схаваны ў шкарпэтку скрутак, абгорнуты поліэтыленавай плёнкай. Турыст прызнаўся мытнікам, што ў ім знаходзіцца наркотык.
Пазней эксперты пацвердзілі, што рэчыва са скрутка — гэта гашыш, а агульная яго маса — больш за 2,5 грама.
Цяпер у дачыненні да затрыманага француза завялі справу паводле ч. 1 арт. 328-1 Крымінальнага кодэкса Беларусі. Гэты артыкул як максімальнае пакаранне прадугледжвае да сямі гадоў пазбаўлення волі.
Чытайце таксама:
У Варшаве па падазрэнні ў захоўванні наркотыкаў затрымалі трох беларусаў
У Брэсце жанчына перавозіла наркотыкі ў дзіцячым вазку з дзіцём
Беларус голым бегаў па Варшаве і справакаваў некалькі ДТЗ. Прычына — наркотыкі