Былую жонку палітвязня, якая спявае песні Ганны Сялук, ушанавалі на «Песні года»
Сёння ў мінскім Палацы спорту праводзіцца фестываль «Песня года Беларусь 2024». На такіх мерапрыемстваў апошнія гады рэдка абыходзіцца без ушанавання праўладных артыстаў, якія супрацоўнічаюць з нявесткай Лукашэнкі, паэткай-песенніцай Ганнай Сялук.
Ганна Благава атрымлівае ўзнагароду. Фота: АНТ
Вось і гэтым разам у намінацыі «Выканаўца года (жаночы вакал)» пераможцай абвясцілі лейтэнанта міліцыі Ганну Благаву.
Яе цяпер часта круцяць па БТ і заказваюць на асабліва важныя ідэалагічныя мерапрыемствы. З 2020 года яна стала выконваць песні Ганны Сялук-Лукашэнкі, і тады ўзнагароды на яе пасыпаліся як з рога багацця.
Раней Ганна Благава была жонкай уладальніка івэнт-агенцтва Сяргея Гуня, які ў 2020-м адкрыта выступіў за перамены ў краінеі быў асуджаны на 2,5 года калоніі па артыкуле 130 ч. 1 КК (наўмысныя дзеянні, накіраваныя на ўзбуджэнне расавай, нацыянальнай, рэлігійнай альбо іншай сацыяльнай варожасці або варожасці па прыкмеце расавай, нацыянальнай, рэлігійнай, моўнай ці іншай сацыяльнай прыналежнасці).
Аналагічную ўзнагароду сярод мужчын — «Выканаўца года (мужчынскі вакал)» — сёлета ўручылі вядомаму спеваку Руслану Аляхно, які таксама неаднаразова дэманстраваў праўладную пазіцыю, а таксама адкрыта і паслядоўна падтрымлівае расійскую агрэсію ва Украіне.
Руслан Аляхно атрымлівае ўзнагароду. Фота: АНТ
Узнагароду ў намінацыі «Найлепшы музычны відэакліп» далі Алёне Ланской.
Алёна Ланская атрымлівае ўзнагароду. Фота: АНТ