«Пшэпшык». Гэта рэальны тэг, пад якім прапаганда піша пра выбары ў Польшчы і распальвае недавер да іх вынікаў

Выкарыстоўваюцца тэгі #пшепшик #дурятполяка #польшабезвыбора #невероятныеполяки. 

Выбары прэзідэнта ў суседняй Польшчы выклікалі надзвычайнае ажыўленне прапаганды.

Дзяржаўныя раённыя выданні напярэдадні выбараў апублікавалі артыкулы БелТА з гучнымі загалоўкамі: «Інтэрнэт-уплыў, фонды Сораса і Абама. Польшчу напярэдадні выбараў скаланае магутны палітычны скандал», «Тролі і ботаферма на польскіх выбарах быццам бы працавалі на Пуціна: грандыёзны скандал у Варшаве».

У сваю чаргу на старонках «Мінскай праўды» аналітык-камуніст Андрэй Лазуткін заўважаў на выбарах «раскол і няздольнасць выбраць лідара ў першым туры», «кожныя выбары пачынаюцца і заканчваюцца пагрозамі пасадзіць адзін аднаго».

«ПіСаўцаў (прыхільнікаў партыі «Права і справядлівасць», кандыдатам ад якой лічыцца афіцыйна беспартыйны Караль Наўроцкі — рэд.) лічаць мафіяй», «Тшаскоўскі — стаўленік Бруселя», — тлумачыў аналітык.

«Насамрэч адбудзецца сутычка паміж Вашынгтонам і Бруселем. І не важна, што галасы палякаў, як кропля ў моры, растворацца ў агульным патоку палітычных інтрыг. Галоўнае — працэс!» — адзначае канал Заходняга аператыўнага камандавання Мінабароны «На западном рубеже». Яны размясцілі аж пяць матэрыялаў пад рубрыкай «Скандал на выбарах».

У дзень выбараў у канале з’явілася паведамленне без пазначэння крыніцы інфармацыі пра тое, што «на адным з выбарчых участкаў намеснік старшыні камісіі пачуў нешта падазронае і вырашыў праверыць аднаго з членаў камісіі на ўжыванне алкаголю. Павёў яго на медагляд, а той — уцёк! Відавочна, алкатэстар у ягоныя планы не ўваходзіў. На іншым участку ў сябра камісіі наогул 0,18 праміле выявілі».

Акрамя гэтага паведамляецца пра тое, што «мноства грамадзян патрабуюць перарабіць бюлетэні», бо ў іх абрэзаны верхні правы вугал для спрашчэння выкарыстання шрыфта Брайля.

Вось як інфармуюць пра выбары ў Польшчы аўтары канала «Беларускі фронт», які звязваюць з ідэолагамі спецназа Мінабароны Беларусі:

«У Бельска-Бялай раз'юшаны жмых пакусаў аднаго з членаў выбарчай камісіі. Галасаванне ў гэты момант не спынялі. Сэнсу няма, бо ўсё і так загадзя вядома.

Там жа, на ўчастку ў пачатковай школе №33, памёр 84-гадовы выбаршчык. Гэта ўжо другая смерць за суткі: раней аналагічны выпадак здарыўся ў Шчэціне.

 У Варшаве адзін з участкаў эвакуявалі з-за паху гару — узгаранне не пацвердзілася.

Яшчэ двое сяброў выбарчых камісій проста падчас галасавання вырашылі раскаціць бутэлечку гарачыцельнага. У стане алкагольнага ап'янення іх адхілілі ад электаральнай кампаніі. Што і як там яны кантралявалі, можаце меркаваць самі».

Акрамя гэтага, канал размясціў здымак нібыта выбарчага бюлетэня, у якім ад рукі ўнесена прозвішча Лукашэнкі, падпісаўшы: «Прагаласавалі на выбарах у Польшчы за сапраўднага лідара»

У іншым пасце «Беларускі фронт» накінуўся на аднаго з галоўных прэтэндэнтаў на пасада прэзідэнта Рафала Тшаскоўскага. 

«Гэта палітык, чыя кар'ера цесна звязаная з замежнымі фондамі і структурамі ўплыву. У 1995 годзе ён атрымаў стыпендыю фонду Джорджа Сораса — сімвалу заходняга ўмяшальніцтва. (…)

Задача Тшаскоўскага заключаецца ў прасоўванні чужога традыцыйным польскім каштоўнасцям парадку дня — ад ЛГБТ да ўзмацнення мілітарызацыі. (…) Тшаскоўскі — палітык, якім кіруюць, а значыць, выбары ў Польшчы — толькі фармальнасць, якая навязаная звонку».

Напярэдадні выбараў тэлеграм-канал «Невальфовіч», які звязаны з Радай бяспекі, уключыў Польшчу ў «спіс псеўдадэмакратый».

«Беларусы вяртаюцца з Польшчы ў Беларусь. Прычыны — да банальнага простыя: дрэнная медыцына, адсутнасць рускай мовы і стаўленне да іх як да адкідаў. Адныя знайшлі ў сабе сілу прызнаць памылкі і вярнуліся дадому. Іншыя — да гэтага часу цярпяць знявагі», — пішуць аўтары.

Пасля першага тура выбараў тэлеграм-каналы раёнаў размясцілі спасылку на артыкул Лазуткіна на сайце «Мінскай праўды» пад гучнымі загалоўкамі: «Фальсіфікацыі на выбарах у Польшчы? Варшаву калоціць ад парушэнняў і падазрэнняў».

«Пашкоджаныя пломбы, непералічаныя бюлетэні, ігнараванне таямніцы галасавання… У Варшаве разгараецца гучны скандал: намесніка выбаркама выдалілі з участку пасля заяў аб парушэннях. Пасля скандалу жанчыну выдалілі і замянілі новым сябрам камісіі. Усе парушэнні былі пісьмова выкладзеныя ў пратаколе камісіі, але ў польскім ЦВК заявілі, што нічога пра гэты выпадак не ведаюць. Зручна, праўда?»

— коратка пераказваюць артыкул тэлеграм-каналы і суправаджаюць тэгамі #пшепшик #дурятполяка #польшабезвыбора.

«Цалкам імаверна, што ў сталіцы сапраўды адбываецца накрутка галасоў за кошт адміністрацыйнага рэсурсу і ўкідвання бюлетэняў за Тшаскоўскага. Аднак асноўны механізм укіду, мяркуючы па ўсім — гэта замежная акруга, як было і ў выпадку з Малдовай», — піша сам Лазуткін.

Акрамя гэтага, на сайтах раёнак выйшаў вялікі матэрыял пад назвай «Ультраправы сюрпрыз, Дуда ў кубе і няправільныя бюлетэні» аўтарства Віты Ханатаевай з БелТА. Асобнае месца ў ім адведзена асвятленню нібыта надзвычайных парушэнняў падчас выбараў. 

Аўтарка паведамляе, што з 17 мая зафіксавана больш за 200 парушэнняў цішыні, «пераважна ў інтэрнэце», «польская апазіцыя заявіла, што відавочнае замежнае ўмяшанне ў выбарчую кампанію з выкарыстаннем інтэрнэт-тэхналогій», «у сам дзень галасавання, 18 мая, з’явіліся паведамленні пра падробленыя бюлетэні», «выбаршчыкам выдаюць непраштампаваныя бюлетэні», «махінацыі з бюлетэнямі», «праштампавалі толькі некаторыя з гэтых бюлетэняў, а не ўсе», «пячатка выглядала так, нібы яе падрабілі».

Як бачым, прапаганда хоча стварыць уражанне, што выбары ў Польшчы сфальсіфікаваныя і аператачныя — дакладна такія ж, якія яны ў сапраўднасці ў лукашэнкаўскай Беларусі. 

{DONATE_PAYPAL}

Каментары да артыкула