Польшча будуе новую электронную сцяну на мяжы з Беларуссю
Па словах польскага міністра ўнутраных спраў Томаша Семоняка, у Люблінскім ваяводстве ўздоўж Буга ідзе актыўнае будаўніцтва новай электроннай агароджы. Плануецца, што да 20 ліпеня праект будзе завершаны.
Польска-беларуская мяжа. Здымак ілюстрацыйны
Гэтая агароджа будзе складацца прыкладна з 1800 мачтаў з 4500 камерамі відэаназірання, у тым ліку начнога і цеплавізійнага. Таксама будуць усталяваныя спецыяльныя датчыкі, якія рэагуюць на рух, і пракладзена каля 200 кіламетраў кабеляў для электрасілкавання і перадачы даных.
Томаш Семоняк адзначыў, што на ўмацаванне інфраструктуры на мяжы з Беларуссю ўжо выдаткавалі каля 2,6 мільярда злотых (прыкладна 700 мільёнаў даляраў). Акрамя гэтага, Польшча плануе павялічыць колькасць памежнікаў на гэтым участку яшчэ на 1,5 тысячы чалавек.
Раней на польска-беларускай мяжы пабудавалі сталёвы плот вышынёй 5 метраў і даўжынёй 186 км, прызначаны для барацьбы з нелегальнай міграцыяй. Ён таксама абсталяваны электроннай сістэмай назірання.
Чытайце таксама:
Адзіная гміна ў Польшчы, дзе перамог Мэнцэн, заселеная беларусамі. Але галасавалі не яны
Польскія памежнікі заявілі, што з беларускага боку мігрантам дапамагалі людзі ў форме
Польскі памежнік пацярпеў ад камянёў мігрантаў на мяжы з Беларуссю