Апублікаваны поўны тэкст мірных прапаноў Украіны, якія Кіеў прадставіць на перамовах у Стамбуле
Агенцтва Reuters апублікавала поўны пераклад украінскай «дарожнай карты», якую ўкраінская дэлегацыя плануе прадставіць Расіі падчас другога раўнду перамоў у Стамбуле, прызначанага на 2 чэрвеня. Расія заяўляе, што таксама падрыхтавала ўласны мемарандум, у якім апісвае «ўсе аспекты надзейнага пераадолення першапрычын крызісу», але адмовілася перадаць яго Украіне загадзя ці апублікаваць у прэсе.
Фота: Andriy Andriyenko / Ukraine's 65th Mechanized Brigade via AP
Украіна-Расія: Рамкі перамоў
I. Асноўныя прынцыпы Пагаднення і перамоўнага працэсу
• Поўнае і безумоўнае спыненне агню ў небе, на сушы і на моры як неабходны фон і перадумова для мірных перамоў.
• Меры па ўмацаванні даверу — вырашэнне гуманітарных пытанняў: безумоўнае вяртанне ўсіх дэпартаваных і незаконна перамешчаных украінскіх дзяцей. Абмен усімі зняволенымі (паводле прынцыпу «ўсіх на ўсіх»). Вызваленне Расіяй усіх цывільных закладнікаў.
• Непаўтарэнне агрэсіі: мэтай перамоў з’яўляецца аднаўленне сталага падмурку для трывалага міру і бяспекі, а таксама забеспячэнне таго, каб агрэсія не паўтарылася зноў.
• Гарантыі бяспекі і ўдзел міжнароднай супольнасці: Украіна павінна атрымаць моцныя гарантыі бяспекі. Бакі запросяць міжнародную супольнасць удзельнічаць у перамовах і забяспечваць выкананне пагадненняў.
• Суверэнітэт: Украіна не абавязана быць нейтральнай. Яна можа выбіраць належнасць да еўраатлантычнай супольнасці і імкнуцца да сяброўства ў ЕС. Сяброўства Украіны ў НАТА залежыць ад кансенсусу ўнутры Альянсу. Не дапускаюцца ніякія абмежаванні адносна колькасці, размяшчэння або іншых параметраў Узброеных сіл Украіны, а таксама размяшчэння войскаў дружалюбных замежных дзяржаў на тэрыторыі Украіны.
• Тэрытарыяльныя пытанні: тэрытарыяльныя здабыткі Расіі, зробленыя з лютага 2014 года, не прызнаюцца міжнароднай супольнасцю. Лінія сутыкнення з’яўляецца адпраўной кропкай для перамоў. Тэрытарыяльныя пытанні абмяркоўваюцца толькі пасля поўнага і безумоўнага спынення агню.
• Санкцыі: пэўныя санкцыі могуць быць знятыя з Расіі, але паступова і паэтапна, з механізмам вяртання санкцый пры неабходнасці (механізм snapback). Замарожаныя расійскія суверэнныя актывы выкарыстоўваюцца для аднаўлення Украіны ці застаюцца замарожанымі да выплаты рэпарацый.
• Выкананне: узгадніць выразную, збалансаваную і дасягальную дарожную карту па выкананні і кантролі за выкананнем пагадненняў.
II. Наступны крок — узгадненне спынення агню і парадку дня сустрэчы лідараў
• Пасля сустрэчы ў Стамбуле бакі працягваюць перамовы, якія павінны быць засяроджаныя на: (1) поўным і безумоўным спыненні агню: яго ўмовах і маніторынгу; (2) мерах па ўмацаванні даверу; (3) падрыхтоўцы, узгадненні парадку дня і структуры будучых перамоў лідараў па ключавых тэмах.
• Перамовы праводзяцца пры ўдзеле ЗША і Еўропы.
III. Спыненне агню
• Поўнае і безумоўнае спыненне агню ў небе, на сушы і на моры хаця б на 30 дзён (з магчымасцю працягнення кожныя 30 дзён) як неабходная перадумова для мірных перамоў.
• Маніторынг спынення агню, які ўзначальваецца ЗША і падтрымліваецца трэцімі краінамі.
IV. Меры па ўмацаванні даверу
• Пасля паспяховага абмену ваеннапалоннымі пасля перамоў у Стамбуле, бакі працягваюць працэс абмену ваеннапалоннымі (паводле прынцыпу «ўсіх на ўсіх»).
• Пагадненне аб безумоўным вяртанні Расійскай Федэрацыяй усіх дэпартаваных і перамешчаных украінскіх дзяцей, а таксама вызваленні Расіяй усіх цывільных зняволеных. Гэтыя меры павінны ўключаць усе катэгорыі асоб, пачынаючы з лютага 2014 года.
V. Сустрэча лідараў
• Лідары Украіны і Расіі сустракаюцца для ўзгаднення ключавых аспектаў канчатковага мірнага пагаднення.
• Ключавыя тэмы мірнага пагаднення, якія павінны быць узгодненыя лідарамі:
-
Пастаяннае і поўнае спыненне вайсковых дзеянняў: умовы, маніторынг, санкцыі за парушэнні.
-
Гарантыі бяспекі і непаўтарэнне агрэсіі.
-
Тэрытарыяльныя пытанні.
-
Эканоміка, кампенсацыі, аднаўленне.
-
Пакаранне за парушэнне пагадненняў.
-
Заключэнне канчатковага мірнага пагаднення.