«Раз'язджаліся проста па тратуарах». Каля новага стадыёна пасля матча адбыўся калапс
Гульню зборных Беларусі і Расіі, паводле афіцыйных даных, наведалі амаль 30 тысяч гледачоў. Выехаць ім са стадыёна было праблематычна.
Фота: Onliner
Пасля таварыскага матчу паміж зборнымі Беларусі і Расіі (1:4) каля новага Нацыянальнага футбольнага стадыёна адбыўся транспартны калапс.
Згодна з пратаколам, гульню наведала 27314 гледачоў. Шмат хто з іх прыехаў на машынах. Раз'ехацца пасля матчу было цяжка, пiша Onliner.
«Калапс на дарогах і ў дварах каля Нацыянальнага футбольнага стадыёна. Аўтамабілі спрабавалі раз'ехацца проста па тратуарах. Вялікая чарга на выездзе на Партызанскі праспект», — расказаў відавочца.
Фота: Onliner
На фота сапраўды відаць, як некаторыя машыны выехалі на тратуар, каб паспрабаваць прарвацца на праспект. Днём перад матчам сітуацыя была не лепшая. Вялікі корак утварыўся проста на праспекце.
Фота: Onliner
Нацыянальны стадыён разлічаны на 33 тысячы гледачоў. Пры гэтым архітэктары не прадугледзелі паркоўку і выезды са стадыёна. Паркінг на арэне разлічаны ўсяго на 307 месцаў. Многім заўзятарам давялося пакідаць машыны ў дварах па суседстве.
Чытайце таксама:
Хто тыя людзі, якімі запоўнілі Нацыянальны футбольны стадыён пры яго адкрыцці?