На фоне вайсковага парада Трампа ў Вашынгтоне па ўсёй Амерыцы прайшлі пратэсты
У ЗША праходзіць масавая хваля пратэстаў супраць Дональда Трампа і яго палітыкі. Тысячы амерыканцаў выходзяць на вуліцы, пакуль у сталіцы праходзіў вайсковы парад з нагоды 250-годдзя арміі і дня нараджэння прэзідэнта.
Прэзідэнт Дональд Трамп і першая лэдзі Меланія Трамп глядзяць феерверк пасля парада ў гонар 250-годдзя арміі, які супаў з 79-м днём нараджэння Трампа, у суботу, 14 чэрвеня 2025 года, у Вашынгтоне. Фота: Doug Mills / The New York Times via AP, Pool
14 чэрвеня ў Вашынгтоне адбыўся рэдкі для ЗША вайсковы парад, прымеркаваны да 250-годдзя амерыканскай арміі, але супаў і з 79-годдзем Дональда Трампа. Падзея выклікала шырокую хвалю пратэстаў па ўсёй краіне, арганізаваных рухам «No Kings» — «Не каралям». Яны абвінавачваюць Трампа ў аўтарытарных тэндэнцыях і зневажанні закона.
Мітынгі прайшлі ў Нью-Ёрку, Філадэльфіі, Лос-Анджэлесе, Сан-Францыска і іншых буйных гарадах. Людзі выходзілі з амерыканскімі сцягамі і лозунгамі супраць палітыкі прэзідэнта. У Лос-Анджэлесе асаблівую напружанасць выклікала прысутнасць Нацыянальнай гвардыі і марской пяхоты, уведзеных Трампам пасля акцый супраць антыіміграцыйных аблаў.
Нягледзячы на тое, што пратэсты ў асноўным праходзілі мірна, у некаторых гарадах дайшло да беспарадкаў і падпалаў аўтамабіляў. У Мінесоце адбыўся шакуючы напад на двух заканадаўцаў, адзін з якіх загінуў.
Падчас параду ў Вашынгтоне былі задзейнічаныя больш за 6000 вайскоўцаў, 150 адзінак тэхнікі і 50 лятальных апаратаў.
Падчас парада. Фота: AP Photo / Mark Schiefelbein
Сярод цяжкай тэхнікі па горадзе праехалі танкі M1 Abrams і баявыя машыны Bradley. Крытыкі назвалі парад «кірмашом пыхлівасці» і «непатрэбным марнатраўствам грошай» — яго кошт склаў $45 мільёнаў.
Пратэстоўцы сцвярджаюць, што барацьба не супраць арміі, а супраць выкарыстання ваеннай сілы для асабістага самапіяру прэзідэнта.
Дэманстрант, які стаіць насупраць супрацоўнікаў сталічнай паліцыі акругі Калумбія, трымае рукі ўверх падчас пратэсту, які праходзіць у дзень вайсковага парада, прысвечанага 250-годдзю арміі, 14 чэрвеня 2025 года, у Вашынгтоне. Фота: AP Photo / Evan Vucci
Апытанні паказваюць, што нягледзячы на пратэсты, міграцыйная палітыка Трампа карыстаецца падтрымкай большасці амерыканцаў — 54% апытаных падтрымліваюць дэпартацыю нелегальных мігрантаў.