Na fonie vajskovaha parada Trampa ŭ Vašynhtonie pa ŭsioj Amierycy prajšli pratesty
U ZŠA prachodzić masavaja chvala pratestaŭ suprać Donalda Trampa i jaho palityki. Tysiačy amierykancaŭ vychodziać na vulicy, pakul u stalicy prachodziŭ vajskovy parad z nahody 250-hodździa armii i dnia naradžeńnia prezidenta.
Prezident Donald Tramp i pieršaja łedzi Miełanija Tramp hladziać fiejervierk paśla parada ŭ honar 250-hodździa armii, jaki supaŭ z 79-m dniom naradžeńnia Trampa, u subotu, 14 červienia 2025 hoda, u Vašynhtonie. Fota: Doug Mills / The New York Times via AP, Pool
14 červienia ŭ Vašynhtonie adbyŭsia redki dla ZŠA vajskovy parad, prymierkavany da 250-hodździa amierykanskaj armii, ale supaŭ i z 79-hodździem Donalda Trampa. Padzieja vyklikała šyrokuju chvalu pratestaŭ pa ŭsioj krainie, arhanizavanych rucham «No Kings» — «Nie karalam». Jany abvinavačvajuć Trampa ŭ aŭtarytarnych tendencyjach i źnievažańni zakona.
Mitynhi prajšli ŭ Ńju-Jorku, Fiładelfii, Łos-Andželesie, San-Francyska i inšych bujnych haradach. Ludzi vychodzili z amierykanskimi ściahami i łozunhami suprać palityki prezidenta. U Łos-Andželesie asablivuju napružanaść vyklikała prysutnaść Nacyjanalnaj hvardyi i marskoj piachoty, uviedzienych Trampam paśla akcyj suprać antyimihracyjnych abłaŭ.
Niahledziačy na toje, što pratesty ŭ asnoŭnym prachodzili mirna, u niekatorych haradach dajšło da biesparadkaŭ i padpałaŭ aŭtamabilaŭ. U Miniesocie adbyŭsia šakujučy napad na dvuch zakanadaŭcaŭ, adzin ź jakich zahinuŭ.
Padčas paradu ŭ Vašynhtonie byli zadziejničanyja bolš za 6000 vajskoŭcaŭ, 150 adzinak techniki i 50 latalnych aparataŭ.
Padčas parada. Fota: AP Photo / Mark Schiefelbein
Siarod ciažkaj techniki pa horadzie prajechali tanki M1 Abrams i bajavyja mašyny Bradley. Krytyki nazvali parad «kirmašom pychlivaści» i «niepatrebnym marnatraŭstvam hrošaj» — jaho košt skłaŭ $45 miljonaŭ.
Pratestoŭcy śćviardžajuć, što baraćba nie suprać armii, a suprać vykarystańnia vajennaj siły dla asabistaha samapijaru prezidenta.
Demanstrant, jaki staić nasuprać supracoŭnikaŭ staličnaj palicyi akruhi Kałumbija, trymaje ruki ŭvierch padčas pratestu, jaki prachodzić u dzień vajskovaha parada, pryśviečanaha 250-hodździu armii, 14 červienia 2025 hoda, u Vašynhtonie. Fota: AP Photo / Evan Vucci
Apytańni pakazvajuć, što niahledziačy na pratesty, mihracyjnaja palityka Trampa karystajecca padtrymkaj bolšaści amierykancaŭ — 54% apytanych padtrymlivajuć departacyju nielehalnych mihrantaŭ.