На Нёмане лодку з рыбаком аднесла ад берага
21 чэрвеня ратавальнікам паступіла паведамленне аб неабходнасці аказання дапамогі ў пошуку чалавека, паведамляе МНС.
Як высветлілася, напярэдадні раніцай пенсіянер адправіўся лавіць рыбу на раку Нёман каля вёскі Жукевічы, што пад Гродна. Бліжэй да вечара мужчына не вярнуўся, і ягоная жонка звярнулася па дапамогу, бо сувязі з ім не было.
Работнікі МНС і супрацоўнікі міліцыі, абследуючы водную акваторыю, знайшлі рыбака на процілеглым беразе ракі.
Мужчына расказаў, што ён рыбачыў з лодкі. Калі падняўся моцны вецер, лодку прыбіла да іншага берага, і ён змог выбрацца на сушу. Пачуўшы недамаганне, мужчына застаўся чакаць дапамогу, а ягоную лодку парывамі ветру аднесла ў невядомым напрамку.
Ратавальнікі перадалі мужчыну работнікам хуткай медыцынскай дапамогі. Ад шпіталізацыі пенсіянер адмовіўся.