Дэпутат расійскай Дзярждумы ў дзень сваёй смерці здолеў прагаласаваць 11 разоў
Дэпутат ад «Адзінай Расіі» Міхаіл Тарасенка памёр пасля цяжкай хваробы. Але пра гэта абвясцілі толькі пасля таго, як ён «падтрымаў» некалькі законапраектаў, пiша Бі-бі-сі.
Міхаіл Тарасенка. Фота: «Адзіная Расія»
Дэпутат Дзярждумы ад «Адзінай Расіі» Міхаіл Тарасенка ў дзень сваёй смерці 22 ліпеня здолеў узяць удзел у 11 галасаваннях.
Пра смерць дэпутата спікер Дзярждумы Вячаслаў Валодзін абвясціў толькі пасля таго, як расійскі парламент прыняў закон аб забароне пошуку ў інтэрнэце «экстрэмісцкіх» матэрыялаў.
«Ён хварэў, цяжка хварэў. Хвароба аказалася мацнейшай», — сказаў Валодзін.
За сам закон аб пошуку «экстрэмісцкіх» матэрыялаў Тарасенка не галасаваў. Аднак з асабістай карткі дэпутата відаць, што ў дзень смерці ён «падтрымліваў» закон «Аб дэнансацыі Канвенцыі аб водна-балотных угоддзях» і адразу у трох чытаннях «прагаласаваў» за законапраект, які дазваляе жонкам загінулых удзельнікаў вайны карыстацца іх транспартнымі сродкамі да ўступлення ў спадчыну.
Падобныя выпадкі здараліся і раней. У мінулым у Дзярждуме тлумачылі, што дэпутаты, якія прапускаюць пасяджэнне па хваробе, перадаюць калегам сваю картку для галасавання, і тыя галасуюць за іх.
Імаверна, так адбылося і з Тарасенкам, але да трэцяга чытання закона аб пошуку «экстрэмісцкіх» матэрыялаў навіна пра яго смерць, падобна, дайшла да Думы, таму за гэты закон ад яго імя галасаваць не сталі.