Deputat rasijskaj Dziarždumy ŭ dzień svajoj śmierci zdoleŭ prahałasavać 11 razoŭ
Deputat ad «Adzinaj Rasii» Michaił Tarasienka pamior paśla ciažkaj chvaroby. Ale pra heta abviaścili tolki paśla taho, jak jon «padtrymaŭ» niekalki zakonaprajektaŭ, piša Bi-bi-si.
Michaił Tarasienka. Fota: «Adzinaja Rasija»
Deputat Dziarždumy ad «Adzinaj Rasii» Michaił Tarasienka ŭ dzień svajoj śmierci 22 lipienia zdoleŭ uziać udzieł u 11 hałasavańniach.
Pra śmierć deputata śpikier Dziarždumy Viačasłaŭ Vałodzin abviaściŭ tolki paśla taho, jak rasijski parłamient pryniaŭ zakon ab zabaronie pošuku ŭ internecie «ekstremisckich» materyjałaŭ.
«Jon chvareŭ, ciažka chvareŭ. Chvaroba akazałasia macniejšaj», — skazaŭ Vałodzin.
Za sam zakon ab pošuku «ekstremisckich» materyjałaŭ Tarasienka nie hałasavaŭ. Adnak z asabistaj kartki deputata vidać, što ŭ dzień śmierci jon «padtrymlivaŭ» zakon «Ab denansacyi Kanviencyi ab vodna-bałotnych uhodździach» i adrazu u troch čytańniach «prahałasavaŭ» za zakonaprajekt, jaki dazvalaje žonkam zahinułych udzielnikaŭ vajny karystacca ich transpartnymi srodkami da ŭstupleńnia ŭ spadčynu.
Padobnyja vypadki zdaralisia i raniej. U minułym u Dziarždumie tłumačyli, što deputaty, jakija prapuskajuć pasiadžeńnie pa chvarobie, pieradajuć kaleham svaju kartku dla hałasavańnia, i tyja hałasujuć za ich.
Imavierna, tak adbyłosia i z Tarasienkam, ale da treciaha čytańnia zakona ab pošuku «ekstremisckich» materyjałaŭ navina pra jaho śmierć, padobna, dajšła da Dumy, tamu za hety zakon ad jaho imia hałasavać nie stali.