Міністр фінансаў расказаў, на што Беларусь просіць грошай у Расіі
Міністр фінансаў Беларусі Юрый Селіверстаў падчас візіту ў Расію на экалагічную канферэнцыю ў Горна-Алтайску расказаў, што Беларусь звярнулася да Расіі з просьбай прафінансаваць шэраг праектаў.
Юрый Селіверстаў
Паводле слоў чыноўніка, на сустрэчы з расійскімі калегамі абмяркоўвалася не толькі магчымасць прыцягнення новых крэдытаў на інвестыцыйныя праекты, але і рэфінансаванне ранейшых даўгоў.
Асобна ён адзначыў, што Беларусь хоча атрымаць фінансаванне на развіццё нафтаперапрацоўкі і на папаўненне дзяржаўнага бюджэту.
«Вы ведаеце, сёння ў топе пытанні фінансавання нафтаперапрацоўкі, пытанні прыцягнення фінансавання ў бюджэт», — заявіў міністр.
Селіверстаў не ўдакладніў, пра якія сумы ідзе гаворка, але падкрэсліў, што кантакты паміж Мінскам і Масквой носяць рэгулярны і шчыльны характар.
Раней паведамлялася, што Расія дала Беларусі адтэрміноўку па выплатах па дзяржаўных крэдытах на агульную суму каля 800 мільёнаў даляраў — адпаведны закон падпісаў Уладзімір Пуцін.
Чытайце таксама:
Расія рэфінансуе частку выдадзеных Беларусі крэдытаў
Мінфін: Бюджэт 2024 года выкананы без дэфіцыту
Міністр фінансаў Селіверстаў пра «Арэшнік» у Беларусі: Можа, Захад здыме санкцыі адразу