На беларускім рынку працы — больш за 220 тысяч вакансій

Па стане на 13:00 26 ліпеня 2025 года на сайце Дзяржаўнай службы занятасці Беларусі было размешчана 220 063 вакансіі. Гэта на 1,76% больш, чым было 7 ліпеня (216 261 вакансій), заўважыла выданне «Позірк».

Фота ілюстрацыйнае

Найбольшая колькасць вакансій — у Мінску: 59 603. Затым ідуць:

• Мінская вобласць — 35 570;
• Брэсцкая — 27 022;
• Гродзенская — 27 887 (рост на 11,7%);
• Гомельская — 24 175;
• Віцебская — 22 907;
• Магілёўская — 22 553 (рост на 4,75%).

Цікава, што сума рэгіянальных лічбаў (219 717) трохі адрозніваецца ад агульнай колькасці вакансій, пазначанай на сайце.

Згодна з данымі Белстата, у маі 2025 года ў беларускай эканоміцы было занята 4 122,1 тысячы чалавек — гэта на 13,7 тысячы менш, чым у красавіку.

Для параўнання: у студзені 2025 года працавала 4 131,6 тысячы чалавек, у сакавіку — 4 146,2 тысячы. А яшчэ год таму, у маі 2024 года, колькасць занятых была яшчэ меншай — 4 112,2 тысячы.

У Міністэрстве эканомікі раней казалі, што для пераадолення кадравага голаду трэба не толькі прыцягваць новых спецыялістаў, але і ўтрымліваць тых, хто ўжо працуе ў краіне, а яшчэ лепш — вяртаць тых, хто выехаў.

Паводле розных міжнародных ацэнак, пасля падзей жніўня 2020 года Беларусь маглі пакінуць ад 100 да 600 тысяч чалавек.

Каментары да артыкула