Na biełaruskim rynku pracy — bolš za 220 tysiač vakansij

Pa stanie na 13:00 26 lipienia 2025 hoda na sajcie Dziaržaŭnaj słužby zaniataści Biełarusi było raźmieščana 220 063 vakansii. Heta na 1,76% bolš, čym było 7 lipienia (216 261 vakansij), zaŭvažyła vydańnie «Pozirk».

Fota ilustracyjnaje

Najbolšaja kolkaść vakansij — u Minsku: 59 603. Zatym iduć:

• Minskaja vobłaść — 35 570;
• Bresckaja — 27 022;
• Hrodzienskaja — 27 887 (rost na 11,7%);
• Homielskaja — 24 175;
• Viciebskaja — 22 907;
• Mahiloŭskaja — 22 553 (rost na 4,75%).

Cikava, što suma rehijanalnych ličbaŭ (219 717) trochi adroźnivajecca ad ahulnaj kolkaści vakansij, paznačanaj na sajcie.

Zhodna z danymi Biełstata, u mai 2025 hoda ŭ biełaruskaj ekanomicy było zaniata 4 122,1 tysiačy čałaviek — heta na 13,7 tysiačy mienš, čym u krasaviku.

Dla paraŭnańnia: u studzieni 2025 hoda pracavała 4 131,6 tysiačy čałaviek, u sakaviku — 4 146,2 tysiačy. A jašče hod tamu, u mai 2024 hoda, kolkaść zaniatych była jašče mienšaj — 4 112,2 tysiačy.

U Ministerstvie ekanomiki raniej kazali, što dla pieraadoleńnia kadravaha hoładu treba nie tolki pryciahvać novych śpiecyjalistaŭ, ale i ŭtrymlivać tych, chto ŭžo pracuje ŭ krainie, a jašče lepš — viartać tych, chto vyjechaŭ.

Pavodle roznych mižnarodnych acenak, paśla padziej žniŭnia 2020 hoda Biełaruś mahli pakinuć ad 100 da 600 tysiač čałaviek.

Kamientary da artykuła