У «ДНР» завочна судзяць беларускага добраахвотніка
Пракуратура самаабвешчанай «Данецкай народнай рэспублікі» зацвердзіла і перадала ў суд крымінальную справу супраць 42-гадовага беларуса Аляксандра Шаронава, паведамляецца на мясцовым рэсурсе «Блокнот Донецк». Яго абвінавачваюць у тым, што ён удзельнічаў у баявых дзеяннях на баку Узброеных сіл Украіны супраць расійскіх вайскоўцаў.
Фота ілюстрацыйнае
Следства сцвярджае, што вясной 2022 года Шаронаў праз Польшчу трапіў ва Украіну, добраахвотна далучыўся да ўкраінскай арміі і ваяваў у ёй да самай вясны 2025 года. За гэта ён нібыта атрымаў суму, эквівалентную каля трох мільёнаў расійскіх рублёў (каля 37,2 тысяч даляраў).
Шаронава цяпер абвясцілі ў міжнародны вышук і завочна арыштавалі. Ягоную справу перадалі ў «Вярхоўны суд ДНР».