Латушка: Калі я быў міністрам, Качанава мне налівала
Павел Латушка згадаў пра свае кантакты з Наталляй Качанавай і адказаў, ці лёгкая ў яе рука.
Наталля Качанава. Фота: БелТА
Падчас гутаркі ў новым выпуску ютуб-канала «Жыццё-маліна» кіраўнік Народнага антыкрызіснага ўпраўлення, а ў мінулым міністр культуры і дырэктар Купалаўскага тэатра Павел Латушка згадаў некалькі сваіх сустрэч з Наталляў Качанавай.
«Калі я быў міністрам, яна была старшынёй Наваполацкага гарвыканкама. Дык яна абслугоўвала на прыёмах у Полацку. Гэта было 1150-годдзе Полацка», — згадаў Павел Латушка адну з першых сустрэч з Наталляў Качанавай.
На ўдакладняючае пытанне, што азначае «абслугоўвала», былы чыноўнік адказаў: «Налівала».
«Сур'ёзна? Хадзіла з бутэлькай, налівала?», — здзівіўся Мелказёраў.
«Так, — пацвердзіў Латушка і дадаў: — Гэта роля старшыняў райвыканкамаў. Ну не толькі ў гэтым, канечне, але ў тым ліку».
«Дык рука ў яе лёгкая ці не, калі яна налівала?» — спытаў Мелказёраў.
«Я не скажу, каб актыўна піў, таму я не гатовы сказаць, ацаніць», — з усмешкай адказаў былы чыноўнік.
Як згадвае Латушка, пазней, калі Наталля Качанава стала віцэ-прэм'ерам, то папрасіла яго сустрэцца:
«Яна запрасіла мяне, калі я прыехаў у камандзіроўку з Парыжа, і вельмі са мной раілася, каго трэба зрабіць новым міністрам культуры, міністрам адукацыі, міністрам інфармацыі».
Павел Латушка. Скрын відэа: malina_by / YouTube
Тая размова, па словах былога чыноўніка, была «зацікаўленай» і працягвалася дзве з паловай гадзіны. Але пазней Качанава стала той асобай, якая пачала блакаваць яго прасоўванне.
«Пра гэта мне сказаў Рыжанкоў асабіста. Калі я ўжо вяртаўся з Францыі, яна блакавала там нейкія крокі наперад».
Як Качанаву ў Купалаўскім сустрэла прыбіральшчыца
Латушка згадвае выпадак, які адбыўся ў час яго дырэктарства ў Купалаўскім тэатры. На той час Наталля Качанава ўзначальвала Адміністрацыю Лукашэнкі:
«Памятаю, як яна абразілася ў Купалаўскім тэатры. Перад балем [у 2019 годзе], былі рэпетыцыі. Павінен быў першы Купалаўскі баль адбыцца, Лукашэнка скраў яго фактычна. Тады Эйсмант дала даручэнне, што першым балем павінен быць толькі венскі баль, павінен быць толькі Лукашэнка.
Качанава прыйшла ў Купалаўскі тэатр. Мне патэлефанавалі з аховы, ну і я не паспеў спусціцца. І яе сустрэла, пры ўсёй павазе да гэтай прафесіі, прыбіральшчыца з вядром, са швабрай.
І я памятаю, мы падымаемся па лесвіцы, і мне Качанава выгаворвала: «Што ж гэта такое, што мяне прыбіральшчыца сустракае?»
Чытайце таксама:
Турарбекава пра Качанаву: Студэнты ўслых рагаталі з яе
Качанава наказала, каб у Мінску быў ідэальны парадак
Латушка: Старшыня КДБ Вакульчык накіроўваў да мяне прадстаўніка на перамовы ў жніўні 2020-га