У Польшчы знайшлі беларускія цыгарэты ў кантэйнеры, які ехаў з Кітая ў Бельгію
Супрацоўнікі польскай мытна-падатковай службы ў Малашэвічах каля мяжы з Беларуссю знайшлі кантрабанду цыгарэт у кантэйнеры, які ехаў з Кітая ў Бельгію. Падчас рэнтгенаўскай праверкі аднаго з вагонаў іх зацікавіў падазроны здымак, таму было праведзена дэталёвае абследаванне.
Фота: lubelskie.kas.gov.pl
Аказалася, што ў кантэйнеры з таварамі з інтэрнэт-крамы разам з законнымі пасылкамі схавалі і незаконныя цыгарэты. Усяго знайшлі больш за 23 тысячы пачак, пазначаных беларускімі акцызнымі маркамі. Паводле версіі польскіх службоўцаў, кантэйнер дапаўнялі кантрабандай падчас перагрузкі ў Беларусі.
Рынкавая вартасць выяўленых цыгарэт перавышае 400 тысяч злотых (каля 111 тысяч даляраў). Пасля рашэння суда тавар будзе канфіскаваны і знішчаны.
Чытайце таксама:
У Латвіі на мяжы з Беларуссю знайшлі аэрастаты з кантрабандай
На мяжы з Літвой знайшлі кантрабанду ў рыбных кансервах са Швецыі