Ціханоўская пра мужа: Увесь ягоны свет перакулены
У інтэрв'ю выданню Politico, дадзеным падчас удзелу ў працы Генеральнай Асамблеі ААН, Святлане Ціханоўскай задалі пытанне і пра яе мужа Сяргея, з якім у тым жа Нью-Ёрку ў яе адбыўся публічны канфлікт у жывым эфіры. Як сказала Ціханоўская, Сяргей «апынуўся ў 2025 годзе, але псіхалагічна заставаўся ў 2020-м».
Сяргей Ціханоўскі і Святлана Ціханоўская 27 чэрвеня 2025 года. Фота: Getty Images
Прыстасаванне да новай рэчаіснасці, адзначыла Ціханоўская, даецца яе мужу няпроста.
«Яму, магчыма, крыху складана цяпер бачыць мяне ў гэтай новай ролі, — сказала яна. — Увесь ягоны свет перакулены. Але я думаю, што ён прызвычаіцца. Ён знойдзе сваё месца».
Сам жа Ціханоўскі, які таксама адказаў на пытанні Politico, мяркуе, што зможа вызначыцца, чым яму далей займацца, прыкладна праз паўгода.
«Цяпер я бачу сваю ролю ў тым, каб былі вызваленыя ўсе 1300 вязняў, — сказаў ён. — І не проста вызваленыя, а каб яны атрымалі дапамогу і падтрымку».
Ён таксама, як і Святлана Ціханоўская, лічыць, што прымірэнчая рыторыка Трампа ў дачыненні да Лукашэнкі мае сэнс:
«Беларусам непрыемна чуць, як Трамп размаўляе з Лукашэнкам, — сказаў ён. — Але беларусы разумныя і дарослыя. Яны не крыўдуюць. Яны разумеюць: калі б гэтых размоў не было, пытання пра вызваленне 1300 палітвязняў проста не ўзнікала б».
Чытайце таксама:
Юлія Міцкевіч пра Ціханоўскага: Турма нікога не робіць лепшым, толькі горшым
«Неразуменне таго, што не ён, а Святлана цяпер цэнтральная фігура. На шкоду грамадскім інтарэсам»
«У нас інтэрв'ю CNN не пад жэншчыну». Як беларусы каментуюць у сацсетках канфлікт Ціханоўскіх