Польшча пакуль не плануе змяняць рашэнне аб адкрыцці памежных пераходаў

Паводле неафіцыйнай інфармацыі, атрыманай журналістам польскага RMF FM Кшыштафам Засадам, Польшча пакуль не плануе змяняць рашэнне аб адкрыцці памежных пераходаў з Беларуссю ў лістападзе, нягледзячы на сур’ёзны крызіс на мяжы Літвы і Беларусі.

Здымак ілюстрацыйны. Крыніца: AP / Rafal Niedzielski

На чацвер запланаваныя кансультацыі намеснікаў міністраў унутраных спраў Літвы, Польшчы і Латвіі.

Літоўскія ўлады тлумачаць гэтыя сустрэчы як частку агульных перамоў, якія тычацца крызісу, выкліканага закрыццём мяжы з Беларуссю.

Польскі бок адзначае, што сустрэча ў намеснікаў міністраў была запланаваная загадзя і павінна была прысвячацца пераважна абмеркаванню міграцыйнага крызісу.

Разам з тым не выключаецца, што падчас кансультацый будзе закранутая і сітуацыя на літоўска-беларускай мяжы.

Аднак, паводле прадстаўнікоў Міністэрства ўнутраных спраў Польшчы, гэтыя перамовы наўрад ці прывядуць да перагляду планаў аб адкрыцці польска-беларускіх пераходаў ужо ў гэтым месяцы.

Пасля рашэння Вільні аб закрыцці мяжы, у Беларусі заблакавалі выезд з краіны больш як тысячы літоўскіх грузавікоў. За іх знаходжанне на тэрыторыі Беларусі спаганяецца па 120 еўра ў суткі з кожнага аўтамабіля, таксама беларускія ўлады пагражаюць канфіскацыяй транспарту.

Каментары да артыкула