Рутэ з іроніяй пракаментаваў грозныя заявы Пуціна

Генеральны сакратар НАТА Марк Рутэ іранічна пракаментаваў заяву прэзідэнта Расіі Уладзіміра Пуціна пра тое, што Расія нібыта гатовая ваяваць з Еўропай. Ён падкрэсліў, што мэта ягоных заяў — толькі сeянне страху і псіхалагічны ціск на еўрапейскія краіны.

Марк Рутэ (справа). Фота: AP Photo/Andreea Alexandru

Рутэ звярнуў увагу, што Пуцін днямі выступаў у вайсковай форме, «як быццам на фронце», хоць насамрэч знаходзіўся ў поўнай бяспецы.

«Я не буду рэагаваць на кожнае слова Пуціна. Мы бачылі яго ў вайсковай форме, але даволі далёка ад фронту», — сказаў кіраўнік НАТА.

Уладзімір Пуцін у вайсковай форме. Фота: AP / Scanpix

Увогуле ён заклікаў усіх не надаваць занадта вялікага значэння такой рыторыцы. На думку Марка Рутэ, шлях да міру — гэта ціск на Расію і пастаяннае забеспячэнне Украіны зброяй, каб яна магла сябе абараняць. Дыпламатычныя намаганні, вядома, важныя, але Украіна павінна падыходзіць да любых перамоў у як мага больш моцнай пазіцыі.

Міністры замежных спраў краін НАТА, якія сабраліся ў Бруселі, таксама не ўспрынялі сур'ёзна словы Пуціна пра «падрыхтоўку да вайны».

Міністарка замежных спраў Фінляндыі Эліна Валтанен следам за Рутэ адзначыла, што такія заявы — гэта спроба запалохвання, і ставіцца да іх трэба спакойна. Па яе словах, НАТА і Еўропа маюць моцныя абарончыя магчымасці і працягваюць іх умацоўваць.

Каментары да артыкула