У Варшаве заўважылі сачэнне за беларусамі з дзецьмі
Гісторыяй, якая адбылася каля дзвярэй памяшкання, куды варшаўскія беларусы па суботах водзяць сваіх дзяцей на тэатральны гурток, падзяліўся ў фэйсбуку журналіст Ігар Кулей.
Фота: facebook.com/igor.kuley
Заняткі ў тэатральным гуртку адбываюцца ў самым цэнтры горада на вялікай плошчы. Сёння арганізатары гуртка нешта запазніліся і своечасова не адчынілі дзверы, таму бацькам з дзецьмі давялося крыху пачакаць.
Каля дзвярэй стаяла некалькі бацькоў з дзецьмі, і адзін з беларусаў запытаў у Ігара, ці ведае ён жанчыну, якая стаяла непадалёк ад групы і ўсіх фатаграфавала. А калі той сказаў, што не, то мужчына параіў яму быць асцярожным.
«Я стаў назіраць. Сярэдняга росту, апранутая ў някідкія колеры, на галаву нацягнуты капюшон. У левай руцэ папяровая торбачка з нейкім печывам, якое яна пад’ядала. У правай руцэ тэлефон, які яна раз пораз кіравала на нас. А калі падыходзіў наступны дарослы з дзіцём, яшчэ здалёк, як бы выпадкова, кіравала апарат і ў іх бок. Яна добра ведала, як рабіць здымкі прыхавана, трымаючы камеру на ўзроўні поясу, а пазней падымала да вачэй і правярала, ці здымак атрымаўся», — апісвае сітуацыю Кулей.
Фота: facebook.com/igor.kuley
Пасля таго ён вырашыў правесці тэст:
«Падышоў так, каб яна трапляла разам са мной у сэлфі-кадр і бачыла, што я здымаю. Яна рэзка развярнулася і схавала твар. Пасля гэтага адышла, стала значна далей ад нас, але працягнула кіраваць камеру ў бок новых беларусаў, якія падыходзілі пад дзверы з дзеткамі».
Калі Ігар падышоў да жанчыны і спытаў па-польску, што адбываецца, яна таксама па-польску без акцэнту адказала, што проста робіць сямейныя фота, і паспрабавала пайсці. Калі ж Кулей выклікаў паліцыю і яна гэта зразумела, то «яна кінулася праз чатырохпалосную дарогу і ўцякла».
Фота: facebook.com/igor.kuley
«Навошта ім гэтыя здымкі? Зламаць людзей псіхалагічна, стварыць уражанне, што нікому нельга давяраць, што вакол агентура. «Мы ўсё пра цябе ведаем, сёння ты быў на занятках са сваім сынам у блакітнай куртцы. У нас і там ёсць свае людзі, падумай пра маленькага сына, супрацоўнічай…», — выказвае сваю версію Ігар Кулей.
Чытайце таксама:
Дзеячы эміграцыі пасварыліся з нагоды спісаў запрошаных на прыём да прэзідэнта Польшчы
«Адчуванне — фантастычнае». Ігар Кулей здзейсніў дзіцячую мару і стаў прыватным пілотам у Польшчы
На БТ заявілі, што шпіён Уладзімір Усер пісаў з Польшчы ў камісію па вяртанні