Беларускія дранікі занялі 14‑е месца ў сусветным топе страў з бульбы
Беларускія дранікі ўвайшлі ў сусветны топ-50 найлепшых страў з бульбы паводле гастранамічнага гіда TasteAtlas. У агульным рэйтынгу яны занялі 14‑е месца, атрымаўшы адзнаку 4,2 бала. Аўтары спісу называюць дранікі самай характэрнай і пазнавальнай беларускай стравай.
Здымак ілюстрацыйны. Фота: Getty Images
Першае месца ў рэйтынгу дасталося латвійскім бульбяным аладкам, далей ідуць аналагічныя стравы са Славакіі і Літвы, а пасля французская бульба «Анна» і іспанская тартылья.
У апісанні падкрэсліваецца, што беларускія дранікі гатуюць з цёртай бульбы з дадаваннем мукі, яек, малака, цыбулі і спецый, смажаць да залацістай скарыначкі і звычайна падаюць са смятанай. У якасці дадатку таксама могуць выкарыстоўвацца грыбы, скваркі, мак або нават садавіна.
Акрамя таго, зараз дранікі займаюць 10‑е месца ў спісе самых папулярных страў на сайце TasteAtlas. У агульным рэйтынгу нацыянальных кухняў свету за 2025—2026 гады беларуская кухня размясцілася на 79‑й пазіцыі з ацэнкай 4,00 бала.
TasteAtlas існуе з 2018 года і пазіцыянуе сябе як атлас сусветнай кухні, а яго рэйтынгі складаюцца на падставе водгукаў карыстальнікаў.
Чытайце таксама:
Аргенцінская газета апублікавала рэцэпт беларускіх дранікаў, які палюбіўся Злучаным Штатам
Белкаапсаюз дэманструе свой патрыятызм праз «Дранік цэнтральнага рэгіёна»
У Беларусі рупяцца пра ўключэнне бабкі і дранікаў у спіс культурнай спадчыны ЮНЕСКА