На беларускай гімназіі ў Вільні напісалі «Рукі прэч ад Скарынаўкі». Кірыліца далася цяжка
Аўтару вандальнага надпісу складана далася кірыліца — спачатку ён увогуле напісаў «п» як «p», давялося перамалёўваць.
«Ч», «д», «ы» — фактычна ўсе літары, якіх няма ў лацінскім алфавіце — таксама атрымаліся ў невядомага правакатара так сабе.
Нагадаем, што нядаўна Віленская гарадская рада прыняла рашэнне, што ўсе малыя дзеці іншаземцаў павінны хадзіць у літоўскамоўныя пачатковыя школы дзеля таго, каб лепш інтэгравацца ў мясцовае грамадства. Для Віленскай беларускай гімназіі, аднак, з гэтага правіла зрабілі адзінае выключэнне.
Мэр Вільні Валдас Бянкунскас асабіста каментаваў гэтую сітуацыю:
«У Вільні здаўна існуе і адна дзяржаўная беларуская школа — імя Францыска Скарыны. На пасяджэнні рады было ўхвалена рашэнне аб змене статута гэтай школы: у ёй стане больш урокаў літоўскай мовы і з’явяцца класы для выраўноўвання ўзроўню літоўскай мовы, таму ў яе можна будзе паступаць як у de facto літоўскую школу».