У Лівіі забілі сына Муамара Кадафі
Паводле інфармацыі агенцтва Reuters, у Лівіі забіты сын Муамара Кадафі — Саіф аль-Іслам. Гэтую інфармацыю пацвердзілі крыніцы, блізкія да яго сям'і, уласны адвакат Кадафі-малодшага і лівійскія СМІ.
Саіф аль Іслам Кадафі
Са звестак саудаўскага тэлеканала «Аль-Хадат», забойства адбылося на паўночным захадзе краіны, недалёка ад горада Зінтан. Паведамляецца, што чацвёра ўзброеных людзей праніклі ў сад 53‑гадовага Саіфа аль-Іслама і застрэлілі яго. Дакладныя матывы і дэталі нападу пакуль застаюцца невядомымі.
«Саіф аль-Іслам загінуў як пакутнік», — сказаў ягоны стрыечны брат Хамід Кадафі лівійскаму спадарожнікаваму тэлеканалу Al Ahrar, дадаўшы, што сям'я не валодае больш падрабязнай інфармацыяй.
Саіф аль-Іслам Кадафі быў ключавой фігурай у атачэнні свайго бацькі: ён не толькі курыраваў знешнюю палітыку, але і выконваў самыя складаныя дыпламатычныя даручэнні.
У лістападзе 2011 года Саіф аль-Іслам Кадафі быў арыштаваны на поўдні Лівіі па ордары Міжнароднага крымінальнага суда. Праз чатыры гады яго прысудзілі да смяротнага пакарання, але затым амніставалі. У 2021 годзе Кадафі-малодшы абвясціў, што будзе балатавацца на пасаду прэзідэнта Лівіі, але выбары тады былі адкладзеныя на нявызначаны тэрмін.
Чытайце таксама:
У Турцыі разбіўся самалёт з начальнікам Генштаба Лівіі на борце
Лівійскія сілавікі вучацца ў Беларусі разганяць пратэсты