Стала вядома, чаму ізраільская Arkia не стала лётаць у Мінск
Асноўнай прычынай аказаліся праблемы са страхаваннем палётаў, піша Office Life.
Фота: Arkia
Яшчэ ў снежні Arkia абвясціла пра намер адкрыць прамы авіярэйс паміж Мінскам і Тэль-Авівам. Палёты планавалася запусціць у лютым 2026 года з частатой два разы на тыдзень — па панядзелках і пятніцах. Аднак ні ў студзені, ні ў лютым набыць квіткі на сайце перавозчыка так і не ўдалося, а ў Нацыянальным аэрапорце Мінск не мелі інфармацыі пра магчымыя тэрміны старту рэйсаў.
Як паведамляюць ізраільскія авіяцыйныя крыніцы, сітуацыя звязаная з тым, што на фоне геапалітычных падзей у рэгіёне і накладзеных на Беларусь санкцый еўрапейскія страхавыя кампаніі адмовіліся страхаваць палёты ў Мінск. У сувязі з гэтым Arkia звярнулася да ўладаў Ізраіля з просьбай забяспечыць для гэтага маршруту дзяржаўнае страхаванне — па аналогіі з рэйсамі ў Маскву.
Пакуль пытанне са страхавым пакрыццём не будзе вырашана, запуск палётаў у Беларусь застаецца немагчымым. Пры гэтым раней паведамлялася, што беларуская авіякампанія Belavia пасля амаль чатырохгадовага перапынку аднавіла рэгулярныя рэйсы з Мінска ў Тэль-Авіў з 8 студзеня.
Чытайце таксама:
Ізраільская авіякампанія, якая заяўляла пра аднаўленне палётаў у Мінск, перадумала гэта рабіць
Аднаўляюцца рэгулярныя палёты ў Мінск з Ізраіля